Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 249 Hüküm no: 345 Orijinal metin no: [46a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed’in babasından intikal eden ev ve dükkândaki hissesinin verilmesi talebiyle Hasan Ağa’ya açtığı davada haksız bulunup reddedildiği Bî-vech-i şer‘î mu‘ârazadan men‘ Ma‘rûz Vilâyet-i Anadolu’da Akçaşehir kazâsı kurâlarından Saklı karyesi ahâlîsinden olup bundan akdem vefât eden Ömer b. el-Hâc Ali’nin verâseti zevce-i menkûha-i metrûkesi Kezban bt. Abdullah nâm hatun ile sulbî kebîr oğulları Mehmed ve Ebubekir ve sulbiye kebîre kızı Ümmühânî Hatun’a münhasıra olduğu lede’ş-şer‘i’l-enver zâhir ve nümâyân oldukdan sonra verese-i mezbûrûndan olup asâkir-i hâssa çavuşlarından merkūm Mehmed İstanbul Bâb Mahkemesi’nde meclis-i şer‘de karye-i mezbûre ahâlîsinden el-Hâc Hasan Ağa b. Ali nâm kimesne muvâcehesinde karye-i mezbûrede vâki‘ her biri ma‘lûmü’l-hudûd ve’l-müştemilât bir bâb mülk menzil ve bir bâb mülk na‘lband dükkân pederim mûrisimiz müteveffâ-yı mezbûrun ile’l-vefât yedinde mülkü olup ba‘de vefâtihî benimle verese-i merkūmûna mevrûs <> olmuşiken sâbık kazâ-i mezbûr a‘yânı gāib ani’l-beled Çakır Ağa babam müteveffâ-yı mezbûrun ma‘lûmü’l-esâmî kimesnelere külliyetli deyni olmağla ben edâ ederim diyerek zikirleri mürûr eden menzil ve dükkânı zabt ve fuzûlî âhara bey‘ etmişidi el-hâletü hâzihî gāib-i merkūm babam müteveffâ-yı mezbûrun kat‘â deynini edâ etmeyip mücerred merkūm el-Hâc Hasan Ağa gāib-i mezbûrun kethüdâsı olmağla öyle olacak sâlifü’z-zikr menzil ve dükkâna mahâllinde vâzı‘u’l-yed olanlardan keff-i yed eder deyü hisse-i irsiyemi bana teslîm edivermek üzere merkūm el-Hâc Hasan Ağa’ya cebr olunsun deyü takrîr-i meşrûhu üzere tasaddî eylediği da‘vâsı meşrû‘a ve iltifâta şâyân olmadığı müdde‘î-i mezbûra tefhîm ve da‘vâ-yı mezkûresiyle merkūm el-Hâc Hasan Ağa’ya bî-vech-i şer‘î mu‘ârazadan men‘ olunduğu huzûr-ı [âlîlerine i‘lâm olundu] Fî 22 Zilhicce sene [1]255