Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 251 Hüküm no: 348 Orijinal metin no: [46a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yağcı Hasan Ağa’ya borcu olan Hasan b. Ahmed’in borcunu ödemesi 102 guruş hüküm Ma‘rûz Yağcı esnâfından el-Hâc Hasan Ağa b. Ömer İstanbul Bâb Mahkemesi’nde meclis-i şer‘de Hasan b. Ahmed nâm kimesne muvâcehesinde merkūm Hasan zimmetinde bundan akdem mâlımdan ve yedimden iştirâ ve kabz eylediği ma‘lûmü’l-vezn ve’l-fiyat revgan-ı çerviş semeninden yüz doksan yedi guruş alacak hakkımın doksan beş guruşunu mukaddemâ mezbûrun yedinden kabz ve istîfâ etmemle bâkīsi olan yüz iki guruşu merkūm Hasan’dan hâlâ taleb ederim deyü da‘vâ ettikde ol dahi cevâbında ber-vech-i muharrer ikrâr lâkin müdde‘î-i merkūmun kabzını mu‘terif olduğu meblağ-ı mezkûrdan yüz iki guruşunu dahi kendiye ceste ceste edâ ve teslîm etmişidim deyü müdde‘î-i merkūmun inkârına mukārin eylediği def‘ine ikāmet-i beyyine edemeyip bi’t-taleb merkūm el-Hâc Hasan Ağa bi’l-muvâcehe vech-i şer‘î üzere tahlîf olunmağın mûcebince dâfi‘-i merkūm def‘-i mezkûruyla mezbûr el-Hâc Hasan Ağa[ya] bilâ-beyyine mu‘ârazadan ba‘de’l-men‘ mezbûr Hasan’ın sâlifü’l-beyân ikrâr ü i‘tirâfıyla lâzım gelen meblağ-ı bâkī-i mezkûr yüz iki guruşun müdde‘î-i mezbûr el-Hâc Hasan Ağa’ya edâsıyla merkūm Hasan ilzâm olunduğu mübâşiri Divriğili Hasan Kavas kulları yediyle huzûr-ı [âlîlerine i‘lâm olundu] Fî 27 Zilhicce sene [12]55