.:: İstanbul Kadı Sicilleri ::.


Anadolu Sadareti Mahkemesi 1 Numaralı Sicil (H. 1247-1250/ M. 1831-1834)
cilt: 93, sayfa: 118
Hüküm no: 100
Orijinal metin no: [21a-4]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Konya’daki Darülhuffâz Vakfı câbîsi Seyyid Mehmed b. Abdurrahman’ın vefatıyla yerine oğlu Seyyid Abdurrahman’ın tayin edilmesi

Sâdır olan fermân-ı âlîlerine imtisâlen işbu arzuhâl [ve] derkenâra nazar olundukda vilâyet-i Anadolu’da yedine Konya kazâsında vâki‘ merhûm Turgudoğlu Ahmed’in Dârü’l-huffâz Vakfı’ndan senevî iki sehm galle ile cibâyet cihetine bâ-berât-ı şerîf-i âlîşân mutasarrıf es-Seyyid Mehmed b. Abdurrahman fevt olup yeri hâlî ve hizmet-i lâzımesi mu‘attal kaldığından mahlûlünden bahs ile müteveffâ-yı merkūmun sulbî kebîr oğlu sahib-i arzuhâl es-Seyyid Abdurrahman dâ‘îlerinden kendüye tevcîh ve yedine berat-ı şerîf i‘tâ olunmasını işbu arzuhâl ile istid‘â eder, fi’l-hakīka cihet-i mezkûrenin müteveffâ-yı merkūmun üzerinde olduğu derkenârdan müstebân ve merkūm es-Seyyid Mehmed’in fevti vâki‘ ve sahib-i arzuhâl [21b] müteveffâ-yı merkūmun sulbî sahîh oğlu olup umûr-ı cibâyet[e] a‘lem olduğu kazâ-i mezbûr ahâlîsinden olup li-ecli’t-taharrî huzûr-ı şer‘-i şerîfe celb olunan Yüzbaşı Ali Ağa b. Halil ve Yüzbaşı Mehmed Ağa b. İbrahim ve mülâzimden Şükrü Ağa b. Ahmed nâm kimesnelerin alâ-tarîkı’ş-şehâde haber vermeleriyle zâhir ve nümâyân olmağın bu sûretde cihet-i mezkûre pederi müteveffâ-yı merkūmun mahlûlünden sulbî sahîh oğlu sahib-i erbâb-ı istihkākdan es-Seyyid Abdurrahman kullarına tevcîh ve yedine berat-ı şerîf-i âlîşân sadaka ve ihsân buyurulmak iktizâ eylediği huzûr-ı âlîlerine i‘lâm olundu.

Fî 17 Ra sene [12]49