Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 257 Hüküm no: 358 Orijinal metin no: [47b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Emine Hanım’ın Mustafa Efendi’ye açtığı alacak davasında sulh olduğu 150 guruş sulh Ma‘rûz-ı dâ‘î-i devlet-i aliyyeleridir ki Medîne-i Üsküdar’a tâbi‘ Bulgurlu karyesinde sâkine mu‘arrefetü’z-zât Şerife Emine bt. Osman nâm hatunun dâmadı ve tarafından husûs-ı âti’l-beyânda vekîl olduğu asâkir-i hâssa mülâzımlarından Salih Ağa b. Mehmed Emin ve Hasan Ağa b. el-Hâc Ahmed nâm kimesneler şehâdetleriyle ber-nehc-i şer‘î sâbit olan sâhib-i arzuhâl Ahmed Ağa b. Ali nâm kimesne İstanbul Bâb Mahkemesi’nde meclis-i şer‘-i hatîrde derûn-ı arzuhâlde ismi mezkûr Mustafa Efendi b. Mehmed muvâcehesinde kayın vâlidem müvekkilem mezbûre Emine Hatun mezbûr Mustafa Efendi zimmetinde bâ-temessük cihet-i karzdan dört yüz kırk guruşdan bâkī iki yüz kırk guruş alacak hakkım olmağla meblağ-ı bâkī-i mezkûr iki yüz kırk guruşu merkūm Mustafa Efendi’den bi’l-vekâle hâlâ taleb ederim deyü tasaddî eylediğim da‘vâmdan bâ-tavassut-ı muslihîn merkūm Mustafa Efendi ile kat‘an li’n-nizâ‘ bi’t-tav‘ ve’r-rızâ yüz elli guruş üzerine bi’l-vekâle ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra müte‘allika da‘vâdan her birimiz âharın zimmetini kabûlü hâvî ibrâ ve iskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr yüz elli guruşun müdde‘î-i müvekkile-i mezbûre Şerife Emine Hatun için müdde‘î-i vekîl-i merkūm Ahmed Ağa’ya edâsıyla merkūm Mustafa Efendi ilzâm olunduğu huzûr-ı [âlîlerine i‘lâm olundu] Fî 23 Zilhicce sene 1255