Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 260 Hüküm no: 364 Orijinal metin no: [48b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Düğmeci Abdullah Ağa’nın İsmail’de emanet bulunan eşyaların kendisine geri verilmesi Ücretden hüküm Ma‘rûz Düğmeci esnâfından Abdullah Ağa b. Mustafa nâm kimesne İstanbul Bâb Mahkemesi’nde meclis-i şer‘de es-Seyyid İsmail b. es-Seyyid Mustafa’nın vâlidesi ve tarafından husûs-ı âti’l-beyânda vekîl olduğu İsmail b. Halil ve Salih Ağa b. Ahmed nâm kimesneler şehâdetleriyle sâbit olan mu‘arrefetü’z-zât Hadice bt. Ahmed nâm hatun muvâcehesinde müvekkil-i merkūm bundan akdem beher hafta on beşer guruş ücret tesmiyesiyle İstanbul’da Düğmeciler sûkunda vâki‘ düğmeci dükkânımda düğmecilik san‘atı ta‘allümü zımnında bana şâkirdlik vechile hizmet ve ba‘dehu müfârakat birle ecr-i müsemmâsından müdet-i mezkûrede müctemi‘a olan dört yüz seksen guruşu ceste ceste yedimden ahz u kabz edip ancak ben mâlımdan müvekkil-i merkūma îdâ‘ ve teslîm eylediğim işbu meclis-i şer‘de mu‘âyene olunan bir çuka yelek ve bir çuka kazağı ve bir fes[i] bana teslîme müvekkil-i mezbûra izâfetle vekîl-i mezbûre Hadice Hatun’a tenbîh olunmak matlûbumdur deyü da‘vâ ettikde ol dahi cevâbında ber-vech-i muharrer ikrâr lâkin müdde‘î-i merkūm zikrleri mürûr eden şalvar ve yelek ve kazağı ve fesi oğlum ve müvekkilim merkūmun ecr-i misli mukābelesinde vermişidim deyü müdde‘î-i merkūmun inkârına mukārin eylediği def‘ine ikāmet-i beyyine edemeyip tahlîfe dahi tâlibe olmamağın mûcebince dâfi‘a-i vekîl-i merkūm def‘-i mezkûruyla merkūm Abdullah Ağa’ya bilâ-beyyine mu‘ârazadan ba‘de’l-men‘ vekîl-i merkūme Hadice Hatun’un sâlifü’l-beyân ikrâr ü i‘tirâfı mûcebince şalvar ve yelek ve kazağı ve fesi müdde‘î-i merkūm Abdullah Ağa’ya def‘ ü teslîme müvekkil-i merkūm es-Seyyid İsmail’e izâfetle vâlidesi vekîl-i mezbûre Hadice Hatun’a tenbîh olunduğu mübâşirleri Bâb-ı Seraskerî kavaslarından Sarmaşıklı Salih Kavas kulları yediyle huzûr-ı [âlîlerine i‘lâm olundu] Fî 28 Zilhicce sene [12]55