Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 261 Hüküm no: 365 Orijinal metin no: [48b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed’in mehir bedelini hanımı Şerife Nefise’ye ödemesi 300 guruş mu‘accel hükmü Ma‘rûz İstanbul’da Ebulfeth Sultan Mehmed Han Câmi‘-i şerîfi kurbünde Kirmasti mahallesinde sâkine mu‘arrefetü’z-zât Şerife Nefise bt. es-Seyyid Ahmed nâm hatun İstanbul Bâb Mahkemesi’nde meclis-i şer‘-i münîrde hâlâ zevci es-Seyyid Mehmed b. Receb nâm kimesne muvâcehesinde ben bundan akdem nefsimi üç yüz guruş mehr-i mu‘accel ve üç yüz bir guruş mehr-i müeccel tesmiyeleriyle mezbûr es-Seyyid Mehmed’e tezvîc ve tenkîh eylediğimde ol dahi tezevvüc ve duhûl edip lâkin mehr-i mu‘accel-i mezkûrumu henüz bana edâ ve îfâ etmemekle suâl olunup mehr-i mu‘accel-i merkūm üç yüz guruşu bana edâya zevcim mezbûr es-Seyyid Mehmed’e tenbîh olunmak matlûbumdur deyü da‘vâ ettikde ol dahi cevâbında kaziyye minvâl-i muharrer üzere olduğunu bi-tamâmihi tâyi‘an ve kat‘iyyen ikrâr ve i‘tirâf etmeğin mûcebince mehr-i mu‘accel-i mezkûr üç yüz guruşu zevcesi müdde‘iyye-i merkūme Hadice Hatun’a edâya zevci mezbûr es-Seyyid Mehmed’e tenbîh olunduğu huzûr-ı [âlîlerine i‘lâm olundu] Fî 29 Zilhicce sene [12]55