Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 262 Hüküm no: 367 Orijinal metin no: [49a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali’nin satın aldığı cariyenin ayıplı çıktığından ceriyeyi geri alıp parasının iadesi talebiyle Ömer Şakir Efendi’ye açtığı davanın reddedildiği Teveccüh-i husûmet bulunmadığı Ma‘rûz Sâhib-i arzuhâl etbâ‘îden Ali b. Mustafa nâm kimesne İstanbul Bâb Mahkemesi’nde meclis-i şer‘-i münîrde Ömer Şakir Efendi b. Mustafa tarafından husûs-ı âti’l-beyânda vekîl olduğu Reşid Ağa b. Mustafa ve el-Hâc İbrahim Ağa b. Ahmed şehâdetleriyle ber-nehc-i şer‘î sâbit olan es-Seyyid Mehmed Şakir Ağa b. el-Hâc Süleyman muvâcehesinde işbu târîh-i i‘lâmdan yirmi beş gün mukaddem cemî‘ uyûbdan sâlime olmak üzere müvekkil-i mûmâ-ileyhin mâlından vekîl-i merkūm es-Seyyid Mehmed Ağa yediyle bin sekiz yüz guruş semen-i medfû‘ ve makbûza iştirâ ve kabz eylediğim işbu hâzıratü bi’l-meclis bir re’s Zenciye ( ) nâm câriye boğazında firengi ta‘bîr olunur illet ile mu‘ayyebe ve illet-i mezkûre câriye-i merkūmede şirâ târîhinden kadîm ve inde’t-tüccâr noksân-ı semen îcâb eder uyûbdan olmağla câriye-i mezkûreyi yedimden ahz birle semen nâmıyla medfû‘um olan meblağ-ı mezkûr bin sekiz yüz guruşu bana redd ü teslîme müvekkil-i mûmâ-ileyhe izâfetle vekîl-i merkūm es-Seyyid Mehmed Şakir Ağa’ya tenbîh olunmak matlûbumdur deyü da‘vâya tasaddî ettikde evvelen teveccüh-i husûmet için câriye-i mezbûre bu misillü uyûbu teşhîse memûr hâlâ ser-etibbâ-i hazret-i cihân-dârî sudûr-ı i‘zâmdan devletlü inâyetlü Abdülhak Efendi hazretlerine irâe olundukda onlar dahi ba‘de im‘âni’n-nazar câriye-i mezbûre[de] reddi mûcib ilel ve emrâza dâir nesne olmadığını arzuhâl hâmişinde mastûr i‘lâm etmeleriyle bu sûretde teveccüh-i husûmet bulunmadıkça müdde‘î-i merkūm Ali Ağa’nın da‘vâ-yı mezkûre<>si mesmû‘a olmadığı kendiye tefhîm olunduğu huzûr-ı [âlîlerine i‘lâm olundu] Fî 23 Zilhicce sene [12]55