Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 263 Hüküm no: 368 Orijinal metin no: [49a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil b. Mustafa’ya borcu olan Tanaş zimmînin borcunu ödemesi 200 guruş hüküm Ma‘rûz Sâhib-i arzuhâl etbâ‘dan Halil b. Mustafa nâm kimesne İstanbul Bâb Mahkemesi’nde meclis-i şer‘-i münîrde tütüncü tâifesinden derûn-ı arzuhâlde mastûrü’l-ism Tanaş v. Petro nâm zimmî muvâcehesinde mersûm Tanaş zimmî zimmetinde yedimde olup işbu sene-i mübâreke Zilka‘detü’ş-şerîfesi gurresi târîhiyle müverrah bir kıt‘a temessük mantûkunca mâlımdan ve yedimden iktirâz ve kabz eylediği iki yüz guruş alacak hakkım olmağla meblağ-ı mezkûru zimmî-i mersûmdan hâlâ taleb ederim deyü da‘vâ ettikde ol dahi cevâbında ikrâr lâkin benim müdde‘î-i merkūm Halil zimmetinde târîh-i merkūmda yedimden ve mâlımdan iştirâ ve kabz eylediği beher vakıyyesi onar guruşa olarak kırk buçuk vakıyye duhân semeninden dört yüz beş guruş alacak hakkım olmağla meblağ-ı mezkûrun iki yüz guruşu deyn-i mezkûruma takās ve mahsûb olunup bâkīsi olan iki yüz beş guruşu merkūm Halil’den taleb ederim deyü Halil’in ikrârına mukārin eylediği müdde‘âsına ikāmet-i beyyine edemeyip tâlib-i tahlîf dahi olmamağın mûcebince mersûm Tanaş da‘vâ-yı mezkûresiyle merkūm Halil’e bilâ-beyyine mu‘ârazadan ba‘de’l-men‘ mersûm Tanaş zimmînin sâlifü’l-beyân ikrâr ü i‘tirâfıyla lâzım gelen meblağ-ı mezkûr iki yüz guruşu müdde‘î-i merkūm Halil’e edâ ve teslîme mersûm Tanaş zimmîye tenbîh olunduğu huzûr-ı [âlîlerine i‘lâm olundu] Fî 20 Zilhicce sene [12]55