Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 264 Hüküm no: 370 Orijinal metin no: [49b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccar Halil’in firar eden Kürkçü Dimitri’deki kürk bedelini ödemesi talebiyle Kürkçü Yuvan’a açtığı davanın reddedildiği Kürk da‘vâsından adem-i iltifât Ma‘rûz Tâcir es-Seyyid Halil b. Mahmud nâm kimesne İstanbul Bâb Mahkemesi’nde meclis-i şer‘de Kürkçü Yuvan v. Niko nâm zimmî muvâcehesinde ben târîh-i i‘lâmdan kırk gün mukaddem gāib ani’l-beled Kürkçü Dimitri v. Ceyri nâm zimmîye mâlımdan iki yüz altmış guruş kıymetli tulum nâfe kürkümü on guruş ücret mukāvelesiyle çuka-i Çerkes biçimi kürk kabına kaplamak için teslîm eylediğimde gāib-i mersûm dahi kabz ettikden sonra zikr olunan kürkü gāib-i mersûm bana vermeksizin diyâr-ı âhara firâr etmekle mücerred mersûm Yuvan zimmî gāib-i mersûm Dimitri zimmî kürkçü esnâfına dâhil olduğu hînde gāib-i mersûmun nefsine kefîli olmağla öyle olacak zikr olunan kürk ve kabının kıymet-i şer‘iyyeleri mersûm Yuvan zimmîden tahsîl olunmak matlûbumdur deyü takrîr-i meşrûhu üzere tasaddî eylediği da‘vâsı meşrû‘a ve iltifâta şâyân olmadığı müdde‘î-i merkūm Halil’e tefhîm ve da‘vâ-yı mezkûresiyle mersûm Yuvan zimmîye bî-vech-i şer‘î mu‘ârazadan men‘ olunduğu huzûr-ı [âlîlerine i‘lâm olundu] Fî 20 Zilhicce sene [12]55