Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 265 Hüküm no: 372 Orijinal metin no: [49b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Ohannes’in Abdullah Efendi’de olan alacağını ödemesi talebiyle biraderi Kadı Ahmed Necib Efendi’ye açtığı davanın reddedildiği Men‘ Ma‘rûz Âsitâne-i aliyye’de mukaddemâ sarrâf tâifesinden Bahçekapılı Ohannes v. Tomas nâm zimmî İstanbul Bâb Mahkemesi’nde meclis-i şer‘-i hatîrde bâ‘isü’l-i‘lâm Anadolu kuzâtından es-Seyyid el-Hâc Ahmed Necib Efendi b. es-Seyyid Ali mahzarında merkūm es-Seyyid Ahmed Necib Efendi’nin birâderi olup Vilâyet-i Anadolu’da Alâiye sancağında vâki‘ İbradi kazâsı sükkânından el-Hâc Abdullah Efendi zimmetinde iki yüz kırk üç senesi Cemâziyelevveli’nin on beşinci günü târîhiyle müverrah bir kıt‘a temessük mantûkunca cihet-i karzdan üç yüz guruş ve târîh-i mezkûrda Balyambolu kazâsında nâib iken bi-şartı’r-rücû‘ emriyle kazâ-i mezbûrun mâhiyyelerine verdiğim beş bin dokuz yüz yirmi beş buçuk guruş ki cem‘an altı bin iki yüz yirmi beş buçuk guruş ile târîh-i mezkûrdan beri güzeştesi olup îcâb eden on bin guruşu dahi mücerred merkūm es-Seyyid Ahmed Necib Efendi medyûnum gāib-i mezbûrun birâderi olduğundan mâ‘adâ gāib-i mersûmun bir müddetden beri muhtellü’d-dimâ‘ olduğu dahi ihbâr olunmağla merkūm es-Seyyid el-Hâc Ahmed Necib Efendi mâlında bana edâ eylesin deyü tasaddî eylediği da‘vâları takrîr-i meşrûhları üzere meşrû‘a ve iltifâta şâyân olmadığı müdde‘î-i mersûm Ohannes zimmîye tefhîm olunmağın mûcebince müdde‘î-i mesfûr Ohannes zimmî da‘vâ-yı mezkûreleriyle merkūm es-Seyyid el-Hâc Ahmed Necib Efendi’ye bî-vech-i şer‘î mu‘ârazadan men‘ olunduğu huzûr-ı [âlîlerine i‘lâm olundu] Fî 4 Muharrem sene 1256