Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 266 Hüküm no: 373 Orijinal metin no: [49b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simitçi Salih’in kendisine, başkasına ait hayvanı satan Canbaz Feyzullah’a açtığı davada sulh oldukları 120 guruşa sulh Ma‘rûz Simitçi tâifesinden Salih b. İbrahim nâm kimesne İstanbul Bâb Mahkemesi’nde meclis-i şer‘-i münîrde canbâz tâifesinden es-Seyyid Feyzullah b. Mehmed nâm kimesne muvâcehesinde ben bundan akdem mezbûr es-Seyyid <> Feyzullah’dan 250 guruş semen-i medfû‘ ve makbûza iştirâ ve kabz eylediğim bir re’s demurî kır bârgiri gāib ani’l-meclis Veliyyüddin b. Abdülaziz nâm kimesne müstahık çıkıp ba‘de’l-isbât ve’l-hükm zikr olunan bârgiri bâ-i‘lâm-ı şer‘î yedimden ahzetmekle ol vechile benim merkūm es-Seyyid Feyzullah’a semen nâmıyla medfû‘um olan meblağ-ı mezkûr iki yüz elli guruşu merkūm es-Seyyid Feyzullah’dan hâlâ taleb ederim deyü tasaddî eylediğim da‘vâmdan bâ-tavassut-ı muslihîn merkūm Feyzullah ile bi’t-tav‘ ve’r-rızâ yüz yirmi beş guruş bedel-i medfû‘a ve makbûza [50a] ba‘de akdi’l-musâlaha ve’l-kabûl mâ‘adâya ve bi’l-cümle husûs-ı mezkûra ve sâir cemî‘ hukūk-ı şer‘iyyeye müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü ikrâr ve tasdîkleri mübâşirleri Bâb-ı Seraskerî kavaslarından Hacı Mehmed Kavas kulları yediyle huzûr-ı [âlîlerine i‘lâm olundu] Fî 20 Zilhicce sene [12]55