Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 267 Hüküm no: 375 Orijinal metin no: [50a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuyumcu Kirkor’un Sabatay’a açtığı alacak davasında sulh olduğu 400 guruşa sulh Ma‘rûz Arzuhâl eden Kuyumcu Kirkor v. Ohannes nâm zimmî İstanbul Bâb Mahkemesi’nde meclis-i şer‘de derûn-ı arzuhâlde mastûrü’l-ism Sabatay v. Yako nâm Yahûdi muvâcehesinde mersûm Sabatay Yahûdi zimmetinde bundan akdem mâlımdan ve yedimden iktirâz ve kabz ve umûruna sarfla istihlâk eylediği beş miskāl inci ve bir zümrüd taş kıymetlerinden bin dört yüz seksen guruş damânen hakkım olmağla meblağ-ı mezkûru mesfûr Sabatay Yahûdiden taleb ederim deyü tasaddî eylediğim da‘vâmdan bâ-tavassut-ı muslihîn mersûm Sabatay Yahûdi zimmî ile bi’t-tav‘ ve’r-rızâ dört yüz guruş üzerine bi’t-terâzî sulh olduğumda ol dahi sulh-ı mezkûru ba‘de’l-kabûl bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra ve işbu târîhe gelince sâir cemî‘ hukūk-ı şer‘iyyeye müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü mukırr-ı mersûm Kirkor zimmînin bi’l-cümle takrîr-i meşrûhunu mesfûr Sabatay Yahûdi tasdîk ve ber-vech-i meşrûh ibrâ eylediği ve ibrâdan müstesnâ bedel-i sulh-ı mezkûr dört yüz guruş zimmetinde müdde‘î-i mersûma deyni olduğunu ikrâr ü i‘tirâf etmeğin mûcebince bedel-i sulh-ı mezkûr dört yüz guruşun müdde‘î-i mersûm Kirkor zimmîye edâsıyla mesfûr Sabatay Yahûdi ilzâm olunduğu huzûr-ı [âlîlerine i‘lâm olundu] Fî 29 Zilhicce sene [1]255