Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 271 Hüküm no: 382 Orijinal metin no: [50b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Salih’in Midillici Mehmed’e olan borcunu ödemesi 60 guruş hüküm Ma‘rûz Midillici tâifesinden Mehmed b. Ömer nâm kimesne İstanbul Bâb Mahkemesi’nde meclis-i şer‘-i münîrde tâife-i merkūmeden Mustafa b. Salih nâm kimesne muvâcehesinde mezbûr Mehmed [Mustafa] zimmetinde târîh-i i‘lâmdan on ay mukaddem mâlımdan ve yedimden iştirâ ve kabz eylediği bir re’s kır bârgir semeninden altmış guruş alacak hakkım olmağla meblağ-ı mezkûru mezbûr Mustafa’dan hâlâ taleb ederim deyü ba‘de’d-da‘vâ ve’l-inkâr müdde‘î-i merkūm ber-vech-i muharrer müdde‘âsını her biri mahâllinde lede’t-tezkiye adl ve makbûlü’ş-şehâde idikleri ihbâr olunan diğer Mehmed b. İsmail ve Arabacı Mehmed b. Hasan nâm kimesneler şehâdetleriyle bi’l-muvâcehe vech-i şer‘î üzere isbât etmeğin mûcebince meblağ-ı mezkûr altmış guruşu müdde‘î-i mezbûr Mehmed’e edâ ve teslîme merkūm Mustafa’ya tenbîh olunduğu mübâşirleri Bâb-ı Seraskerî kavaslarından Sivasî Halil Kavas el-Mübâşir [kulları yediyle huzûr-ı âlîlerine i‘lâm olundu] Fî 26 Zilhicce sene [1]255