Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 273 Hüküm no: 386 Orijinal metin no: [51a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mumcu İsmail’in Karapazarlı Ali Efendi’ye olan borcunu ödemesi 340 guruş hüküm Ma‘rûz Derûn-ı arzuhâlde mezkûrü’l-ism Karapazarî Ali Efendi b. Hüseyin nâm kimesne İstanbul Bâb Mahkemesi’nde meclis-i şer‘-i münîrde Mumcu esnâfından sâhib-i arzuhâl es-Seyyid İsmail b. Mehmed nâm kimesne muvâcehesinde merkūm es-Seyyid İsmail zimmetinde târîh-i i‘lâmdan bir sene mukaddem mâlımdan ve yedimden iştirâ ve kabz eylediği bir re’s bârgir semeninden altı yüz guruş alacak hakkımın iki yüz elli guruşuna takāsen mâlından kula ta‘bîr olunur bir re’s tay ve on guruşuna takāsen ma‘lûmü’l-mikdâr hıntayı bana bey‘ ve teslîm ben dahi iştirâ ve tesellüm ve kabûl ve ol vechile cem‘an iki yüz altmış guruşunu istîfâ etmemle bâkīsi olan üç yüz kırk guruşu hâmiş-i arzuhâlde mastûr İstanbul’da Mahmudpaşa Mahkemesi’nden verilen bir kıt‘a mazbata i‘lâmı nâtık olduğu üzere taleb ederim deyü da‘vâ ettikde ol dahi cevâbında benim müdde‘î-i mezbûr zimmetinde cihet-i karzdan sekiz yüz guruş alacak hakkım olmağla meblağ-ı mezkûru taleb ederim deyü da‘vâ ve her biri âharın müdde‘âsını külliyen inkâr etmeleriyle ol vechile tarafeyn müdde‘âlarını beyâna ba‘de’l-havâle mezbûr Ali Efendi ber-vech-i muharrer müdde‘âsını lede’t-tezkiye adl ve makbûlü’ş-şehâde idikleri ihbâr olunan Karagözoğlu Halil b. Abdullah ve Ali b. Ömer nâm kimesneler şehâdetleriyle bi’l-muvâcehe ber-nehc-i şer‘î ba‘de’l-isbât merkūm es-Seyyid İsmail şâhidân-ı mezbûrânın şehâdetlerini tasdîk ve adâletlerini tahkīk etmeğin mûcebince meblağ-ı bâkī-i mezkûr üç yüz kırk guruşu müdde‘î-i mezbûr Ali Efendi’ye edâ ve teslîme merkūm es-Seyyid İsmail’e tenbîh olunduğu huzûr-ı [âlîlerine i‘lâm olundu] Fî 12 Şevvâl sene [1]255