Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 273 Hüküm no: 387 Orijinal metin no: [51a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Süleyman’ın babasından intikal eden bahçeyi zaptettiği iddiasıyla Değirmenci Haçador’a açtığı davanın Erzincan’da görülmesine karar verildiği Mahalline havâle [Ma‘rûz] Vilâyet-i Anadolu’da E[r]zincan kazâsı kurâlarından Ekrek nâm karyede sâkin iken bundan akdem fevt olan Süleyman b. Halil’in verâseti sulbî kebîr oğulları Mustafa ve Mehmed ve Ahmed’e münhasıra olduğu <> lede’ş-şer‘i’l-enver zâhir ve mütehakkık oldukdan sonra mezbûr Ahmed İstanbul Bâb Mahkemesi’nde meclis-i şer‘-i münîrde Değirmenci Haçador v. Ohan nâm zimmî muvâcehesinde karye-i mezbûrede vâki‘ Berber İsmail ve Kör Halil oğlu Osman ve Demircioğlu bahçeleri ve tarîk-ı âm ile mahdûd ve etrâf-ı erba‘ası kerpiç ve taş duvar ile muhât bir kıt‘a mülk bahçe pederim mûrisimiz müteveffâ-yı mezbûrun hayatında ile’l-vefât müstakıllen <> yedinde mülkü olup ba‘de vefâtihî bahçe-i mezkûre benimle karındaşlarım gāibân ani’l-beled mezbûrân Mustafa ve Mehmed’de mevrûs olmuş iken mesfûr Haçador zimmî bahçe-i mezkûreyi bir müddetden beri fuzûlî zabt [ve] vaz‘-ı yed etmekle suâl olunup bahçe-i mezkûreden keff-i yed birle hisse-i irsiyemi mahâllinde bana teslîme mezbûr Haçador zimmîye tenbîh olunmak matlûbumdur deyü da‘vâ ettikde ol dahi cevâbında zikr olunan bahçeyi târîh-i i‘lâmdan yedi sene mukaddem <> gāib ani’l-beled Mehmed Bey nâm kimesne bana kendi mülkü olmak üzere [51b] iki yüz elli guruş semen-i makbûza bey‘ ü teslîm etmekle ol vechile mülk-i müşterâm olmak üzere vaz‘-ı yed ederim deyü ikrâr mâ‘adâyı külliyen inkâr edip ancak bahçe-i mezkûr menkūl kābilinden olmayıp akār kābilinden olmağla mahâllinde terâfu‘-ı şer‘-i şerîf olunmak iktizâ eylediği müdde‘î-i mezbûra tefhîm olunduğu bi’l-iltimâs huzûr-ı [âlîlerine i‘lâm olundu] Fî-selhi Zilhicce sene 1255