Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 274 Hüküm no: 388 Orijinal metin no: [51b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Ayşe Hanım’ın boşandığı kocası Süleyman’a açtığı mehir ve eşya alacağı davasında anlaşıp zimmet ibrası yaptığı Tatlîk [ve] ibrâ Ma‘rûz Sâhibe-i arzuhâl mu‘arrefetü’z-zât Şerife Âişe bt. el-Hâc <> Hasan nâm hatun İstanbul Bâb Mahkemesi’nde meclis-i şer‘de zevc-i sâbıkı derûn-ı arzuhâlde mezkûrü’l-ism Süleyman b. Mehmed nâm kimesne muvâcehesinde merkūm Süleyman yüz yetmiş beş guruş mehr-i müeccel tesmiyesiyle zevc-i dâhilim iken târîh-i i‘lâmdan üç ay mukaddem medîne-i İzmir’de Arab Fırını nâm mahâlde kâin ma‘an sâkinler olduğumuz menzilde beni tatlîk etmekle mezbûrun zimmetinde mehr-i müeccel-i mezkûrum olan yüz yetmiş beş guruş ile zevcim mezbûr Süleyman bundan akdem menzil-i mezkûr derûnunda mevzû‘ sandığımda mevzû‘ mâlımdan bin guruşumu ve mecmû‘u bin guruş kıymetli bir kilim ve iki yorgan ve üç baş yasdığı ve iki şilte ve yedi sîm zarf ve bir sîm mir‘ât ve bir çuka Çerkes hırkamı bi-gayri hakkın fuzûlî ahz u kabz etmekle eşyâ-i muharrere-i mezkûre mevcûd ise aynılarını değil ise ba‘de’s-sübût kıymet-i mezkûreleriyle meblağ-ı mezkûr bin guruşu mezbûr Süleyman’dan taleb ederim deyü da‘vâya tasaddî etmişidim el-hâletü hâzihî mezbûr Süleyman eşyâ-i muharrere-i mezkûreden ancak zikr olunan sîm mir‘âtı aynen bana teslîme müte‘ahhid olmağla ben dahi mâ‘adâ müdde‘âmdan rızâmla meccânen fâriğ olmamla bi’l-cümle zikr olunan husûslara ve işbu târîh-i i‘lâma gelince sâir cemî‘ hukūk-ı şer‘iyyeye müte‘allika mutallıkan âmme-i de‘âvîden tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü ikrâr ve tasdîkleri huzûr-ı [âlîlerine i‘lâm olundu] Fî 11 Muharrem sene [1]256