Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 276 Hüküm no: 390 Orijinal metin no: [51b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife Hatun’un boşandığı kocası Kapıcı Ali Ağa’nın ödemesi şartıyla küçük çocukları Hüseyin’in ihtiyaçları için nafaka takdir edildiği Nafaka-i sagīr Ma‘rûz Mahrûse-i Galata’ya muzâfe kasaba-i Kasımpaşa’da Seyyid Aliçelebi mahallesinde sâkine sâhibe-i arzuhâl Hanife bt. Hüseyin nâm hatunun vâlidesi ve tarafından husûs-ı âti’l-beyânda vekîli olduğu zât-ı mezbûreyi ârifân Kafesçi Hüseyin Ağa b. Mustafa ve Tatar Hasan Ağa b. Receb nâm kimesneler şehâdetleriyle ber-nehc-i şer‘î sâbit olan Habibe bt. Osman nâm hatun İstanbul Bâb Mahkemesi’nde meclis-i şer‘-i münîrde müvekkile-i mezbûrenin zevc-i sâbıkı derûn-ı arzuhâlde mezkûrü’l-ism Kapıcı Ali Ağa b. Ebubekir nâm kimesne muvâcehesinde kızım müvekkilem mezbûre Hanife Hatun’un mezbûr Ali Ağa ile mukaddemâ zevciyyet beynlerinde kāime iken mezbûrun firâşından hâsıl ve müvekkilem mezbûreden mütevellid ve bi-hakkı’l-hıdâne müvekkilem mezbûrenin hâlâ hacr ü terbiyesinde olan sulbî sagīr oğlu Hüseyin’in aslâ mâlı olmayıp nafaka ve kisveye eşedd-i ihtiyâc ile muhtâc olmağla sagīr-i mezbûrun nafakasi’çün babası mezbûr Ali Ağa üzerine kıbel-i şer‘den kadr-ı ma‘rûf meblağ farz ve takdîr olunmak müvekkilem mezbûrenin bi’l-hıdâne matlûbumdur dedikde mezbûr Ali Ağa dahi ba‘de’t-tasdîk sagīr-i mezbûrun nafakasi’çün babası mezbûr Ali Ağa üzerine bi’t-terâzî târîh-i i‘lâmdan beher yevm yüz yirmişer akçe farz ve takdîr olunup meblağ-ı mefrûz-ı mezkûru sagīr-i mezbûrun nafaka ve kisve ve sâir levâzım-ı zarûriyesine harc ü sarfa ve lede’l-iktizâ istidâneye ve inde’z-zafer babası merkūm Ali Ağa üzerine rücû‘a müvekkile-i mezbûre Hanife Hatun’a izâfetle vâlidesi vekîl-i merkūme Habibe Hatun’a kıbel-i şer‘den izin verildiği huzûr-ı [âlîlerine i‘lâm olundu] Fî 3 Muharrem sene 1256