Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 276 Hüküm no: 391 Orijinal metin no: [52a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuyumcu Bağdisar’ın kefaletten dolayı alacak iddiasıyla Berber Kifork’a açtığı davada sulh olduğu 1000 guruşa sulh [Ma‘rûz] Kuyumcu tâifesinden arzuhâl eden Bağdisar v. Agop nâm zimmî İstanbul Bâb Mahkemesi’nde meclis-i şer‘-i münîrde derûn-ı arzuhâlde mastûr Berber Kifork v. Mikail zimmî muvâcehesinde Artin v. Ohannes mu‘arrefetü’ş-şahs zimmî ve bt. Mikail nâm zevcân hâzırân oldukları hâlde benim Ohan hâzırân-ı mezbûrân zimmetinde işbu yedimde olup bin iki yüz elli beş senesi Zilka‘detü’ş-şerîfesi gurresi târîhiyle müverrah bir kıt‘a temessük mantûkunca cihet-i karzdan alacak hakkım olan bin beş yüz guruşa mersûm Kivork (Kifork) zimmî bundan akdem tarafeynden bi’l-emr ve’l-kabûl kefâlet-i mutlaka-i sahîha-i şer‘iyye ile kefîl ve dâmin olmağla meblağ-ı mezkûr mersûm Kivork (Kifork) zimmîden kefâlet-i mahkiyesine binâen taleb ederim deyü tasaddî eylediğim da‘vâmdan bâ-tavassut-ı muslihîn mersûm Kifork zimmî ile bi’t-tav‘ ve’r-rızâ bin guruş üzerine ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâya ziyâde müdde‘âma ve bi’l-cümle husûs-ı mezkûrda hukūk-ı sâir-i şer‘iyyeye müte‘allika âmme-i da‘vâdan mersûm Kifork zimmî ile Ohan hâzırân-ı mersûmânın zimmetlerini onlar dahi kezâlik husûs-ı mezkûra ve hukūk-ı sâire-i şer‘iyyeye müte‘allika âmme-i da‘vâdan benim zimmetimi her birimiz ibrâ-i âmm-ı sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını kabûl eyledik deyü ba‘de’l-ikrâr ve’t-tesâdık ibrâdan müstesnâ bedel-i sulh-ı mezkûr bin guruşun müdde‘î-i mersûm Bağdisar zimmîye edâ ve teslîme mersûm Kifork zimmîye tenbîh olunduğu huzûr-ı [âlîlerine i‘lâm olundu] Fî 29 Zilhicce sene [1]255