Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 278 Hüküm no: 394 Orijinal metin no: [52a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman b. İsmail’in çocuğu Abdullah’ı bakması şartıyla boşandığı hanımı Saliha Hatun’a verdiği Sagīreyi [sagīri] kendi mâlından infâka ta‘ahhüd i‘lâmı Ma‘rûz İstanbul’da Edirnekapısı kurbünde Kasımağa mahallesinde sâkine mu‘arrefetü’z-zât Saliha bt. Mustafa nâm hatun İstanbul Bâb Mahkemesi’nde meclis-i şer‘de zevc-i sâbıkı Süleyman b. İsmail nâm kimesne muvâcehesinde mezbûr Süleyman ile mukaddemâ zevciyyet beynimizde kāime iken mezbûrun firâşından hâsıl ve benden mütevellid işbu hâzır bi’l-meclis Abdullah nâm sagīr bi-hakkı’l-hıdâne hacr [ü] terbiyemde iken bundan akdem sagīr-i mezbûr yedi yaşını tekmîl ve kendiye istiğnâ hâsıl olduğuna binâen sagīr-i mezbûru babası merkūm benden mutâlebe ve ahz murâd etmişidi el-hâletü hâzihî merkūm Süleyman sagīr-i mezbûru rızâsıyla benim yanımda terk eylediğinde ben dahi [52b] ve mâlımdan infâk ve iksâ edip nafaka nâmıyla babası merkūmdan bir akçe ve bir habbe ve bir nesne mutâlebe etmemek üzere müte‘ahhid oldum deyü mukırra-ı merkūmenin bi’l-cümle takrîr-i meşrûhunu mezbûr Süleyman’ın tasdîk ve tahkīk eylediği mübâşirleri Bâb-ı Seraskerî kavaslarından Mazlum Kavas kulları yediyle huzûr-ı [âlîlerine i‘lâm olundu] Fî 5 Muharrem sene [1]256