Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 279 Hüküm no: 396 Orijinal metin no: [52b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerbetçi Hasan’ın talebiyle boşandığı hanımı Şerife Esma Hatun’un yanında olan kızı Şerife Hatice’nin kendisine verilmesine karar verildiği Sagīreyi babasına teslîme tenbîh Ma‘rûz Bâ‘isü’l-i‘lâm Şerbetçi el-Hâc Hasan b. Mehmed Salih nâm kimesne İstanbul Bâb Mahkemesi’nde meclis-i şer‘de mukaddemâ zevcesi mu‘arrefetü’z-zât Şerife Esma bt. es-Seyyid el-Hâc Hüseyin nâm hatun muvâcehesinde merkūme Şerife Esma Hatun ile mukaddemâ zevciyyet beynimizde kāime iken firâşımdan hâsıl ve mezbûreden mütevellide sulbiye kızım işbu hâzıratü bi’l-meclis Şerife Hadice nâm sagīreyi vâlidesi mezbûre bi-hakkı’l-hıdâne terbiye ve imsâk üzere [iken] merkūme Esma Hatun bu esnâda nefsini sagīre-i hâzıra-i merkūmeye ecnebî olan kimesneye tezvîc ve ol vechile hakk-ı hıdâne kendiden sâkıta ve hâzıne-i uhrâsı dahi olmamağla suâl olunup kızım hâzıra-i mezbûreyi bana teslîme merkūme Şerife Esma Hatun’a tenbîh olunmak matlûbumdur deyü da‘vâ ettikde ol dahi cevâbında kaziyye minvâl-i muharrer üzere olduğunu ikrâr ü i‘tirâf etmeğin mûcebince sagīre-i hâzıra-i mezbûre Şerife Hatice’yi babası merkūm el-Hâc Hasan’a teslîme vâlidesi merkūme Şerife Esma Hatun’a tenbîh olunduğu tescîl ve [bi’]l-iltimâs huzûr-ı [âlîlerine i‘lâm olundu] Fî 13 Muharrem sene 1256