Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 280 Hüküm no: 398 Orijinal metin no: [53a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeynep Hatun ile kocası Berber Receb’in alacak iddiasıyla birbirlerine açtıkları davadan vazgeçip zimmet ibrası yaptıkları Meccânen ibrâ Ma‘rûz İstanbul’da Hocapaşa kurbünde Elvan mahallesinde sâkine mu‘arrefetü’z-zât Zeyneb bt. Ali nâm hatun İstanbul Bâb Mahkemesi’nde meclis-i şer‘de hâlâ zevci berber esnâfından Receb b. Ahmed tarafından husûs-ı âtîde vekîl olduğu el-Hâc Emin Ağa b. Mehmed ve Kayıkçı Hasan b. Süleyman nâm kimesneler şehâdetleriyle ber-nehc-i şer‘î sâbit olan Mehmed Ağa b. Abdullah muvâcehesinde müvekkilim mezbûr Receb zimmetinde bundan akdem mâlımdan ve yedimden iktirâz ve kabz eylediği bin üç yüz guruş alacak hakkım olmağla meblağ-ı mezkûru zevcim müvekkilim mezbûra izâfetle vekîl-i mezbûrdan hâlâ taleb ederim deyü da‘vâ eylediğimde vekîl-i mezbûr dahi ber-vech-i muharrer müdde‘âsını bi’l-vekâle külliyen inkârından mâ‘adâ müvekkilim mezbûrun senin zimmetinde kezâlik cihet-i karzdan iki bin guruş alacak hakkım olmağla meblağ-ı mezkûru bi’l-vekâle taleb ederim deyü inkârıma mukārin benden da‘vâ ve ol vechile beynimizde ba‘de vukū‘i’l-münâza‘a muslihûn tavassutuyla beynimiz tevfîk ve ıslâh olunup her birimiz bi’l-asâle ve bi’l-vekâle tasaddî eylediğimiz da‘vâlarımızdan <> rızâlarımızla meccânen fâriğler olmamızla bi’l-cümle husûs-ı mezkûra ve işbu târîh-i i‘lâma gelince sâir hukūk-ı şer‘iyyeye müte‘allika âmme-i da‘vâdan tarafeynden her birimiz âharın zimmetini bi’l-asâle ve bi’l-vekâle ibrâ-i âmm-ı sahîh-i şer‘î ile ibrâ ve iskāt eyledik deyü ikrâr ve tasdîkleri tescîl ve huzûr-ı [âlîlerine i‘lâm olundu] Fî 27 Zilhicce sene 1255