Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 281 Hüküm no: 399 Orijinal metin no: [53a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalafatçı Ahmed’in alacak iddiasıyla Yani’ye açtığı davada haksız bulunup davanın reddedildiği Bî-vech-i şer‘î mu‘ârazadan men‘ Ma‘rûz Sâhib-i arzuhâl Kalafatçı es-Seyyid Ahmed b. İbrahim nâm kimesne İstanbul Bâb Mahkemesi’nde meclis-i şer‘-i münîrde derûn-ı arzuhâlde mastûrü’l-ism sefine reislerinden Yani v. Danil nâm zimmî muvâcehesinde mersûm Yani zimmî zimmetinde işbu sene-i mübâreke Cumâdelûlâsı’nın yirmi dokuzuncu günü târîhiyle müverrah bir kıt‘a i‘lâm nâtık olduğu üzere bedel-i sulh-ı sahîhden üç bin üç yüz guruş alacak hakkımın sekiz yüz guruşunu mukaddemâ kabz ve istîfâ etmemle bâkīsi olan iki bin beş yüz guruşu mesfûr Yani zimmîden taleb ederim deyü da‘vâ ettikde ol dahi cevâbında ber-vech-i muharrer ikrâr lâkin deynim olan meblağ-ı bâkī-i mezkûru bundan akdem müdde‘î-i mezbûra mahrûse-i Galata’da Kurşunlumahzen’de liman odasında mahzar-ı şuhûdda tamâmen edâ ve teslîm etmişidim deyü ba‘de’d-def‘ ve’l-inkâr dâfi‘-i mersûm ber-vech-i muharrer def‘-i mezkûrunu her biri mahallerinde lede’t-tezkiye adl ve makbûlü’ş-şehâde idikleri ihbâr olunan İbrahim Ağa b. İsmail ve Osman Ağa b. Mustafa nâm kimesneler şehâdetleriyle bi’l-muvâcehe ber-nehc-i şer‘î isbât etmeğin mûcebince müdde‘î-i merkūm es-Seyyid Ahmed da‘vâ-yı mezkûresiyle mesfûr Yani zimmîye bî-vech-i şer‘î mu‘ârazadan men‘ olunduğu huzûr-ı [âlîlerine i‘lâm olundu] Fî 9 Ramazan sene [1]255