Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 286 Hüküm no: 408 Orijinal metin no: [54a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Feyzullah Ağa’nın çocuklarının biriken nafaka parasını boşandığı hanımı Zineti Hatun’a ödemesi 128 guruş nafaka-i müctemi‘adan hüküm Ma‘rûz Sâhibe-i arzuhâl mu‘arrefetü’z-zât Zineti bt. Ali nâm hatun İstanbul Bâb Mahkemesi’nde meclis-i şer‘-i münîrde zevc-i sâbıkı derûn-ı arzuhâlde ismi mezkûr Feyzullah Ağa b. Ali nâm kimesne muvâcehesinde mezbûr Feyzullah Ağa ile mukaddemâ zevciyyet beynimizde kāime iken mezbûrun firâşından hâsıl ve benden mütevellid ve bi-hakkı’l-hıdâne hâlâ hacr ü terbiyemde olan sulbî oğlu İbrahim İbiş nâm sagīrin bâ-hüccet-i şer‘iyye beher şehr otuzar guruş nafaka-i mefrûza-i müstedânesinden müddet-i ma‘lûmede mezbûrun zimmetinde müctemi‘a olan yüz yirmi sekiz guruşu mezbûr Feyzullah Ağa’dan hâlâ taleb ederim deyü da‘vâ ettikde ol dahi cevâbında ber-vech-i muharrer ikrâr lâkin ben meblağ-ı mecmû‘-ı mezkûr yüz yirmi sekiz guruşun otuz guruşunu bundan mukaddem müdde‘iyye-i mezbûreye def‘ ü teslîm etmemle bâkī zimmetimde müdde‘iyye-i mezbûre Zineti Hatun’a doksan sekiz guruş deynim kalmışdır deyü müdde‘iyye-i merkūmenin inkârına mukārin mikdâr-ı mezkûrda eylediği def‘ine ikāmet-i beyyine edemeyip bi’t-taleb müdde‘iyye-i mezbûre Zineti Hatun bi’l-muvâcehe vech-i şer‘î üzere tahlîf olunmağın mûcebince dâfi‘-i mezbûr Feyzullah Ağa def‘-i mezkûruyla müdde‘iyye-i mezbûre Zineti Hatun’a bilâ-beyyine mu‘ârazadan ba‘de’l-men‘ ikrâr ü i‘tirâfı mûcebince meblağ-ı mecmû‘-ı mezkûr yüz yirmi sekiz guruşu müdde‘iyye-i mezbûre Zineti Hatun’a edâ ve teslîme merkūm Feyzullah Ağa’ya <> tenbîh olunduğu huzûr-ı [âlîlerine i‘lâm olundu] Fî 18 Muharrem sene [12]56