Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 287 Hüküm no: 411 Orijinal metin no: [54b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mühtedi Ali’nin vefat eden babası Kürkçü Marat’ın terekesindeki hissesini kardeşi Yani’den alıp zimmet ibrası yaptığı Terekeden ahz u kabz, ibrâ Ma‘rûz Mübârek rikâb-ı kamer-tâb-ı mülûkâneye takdîm olunan arzuhâlde mastûrü’l-ism olup İstanbul hısnı ebvâbından Ayvansaraykapısı dâhilinde Mustafapaşa mahallesinde Oymakapı nâm mahâlde mütemekkin iken işbu târîhden on sene mukaddem hâlik olan Kürkçü Marat v. Uğurlu nâm zimmînin verâseti zevce-i metrûkesi Ezmarağda bt. Yani Nasrâniye ile sulbî kebîr oğulları İstori ve Yani ve sulbiye kebîre kızları Eleniko ve Kadinko Nasrâniyelere münhasıra ve tashîh meselesi kırk sekiz sehmden olup sihâm-ı mezbûreden altı sehmi zevce-i mersûmeye ve on dörder sehmden yirmi sekiz sehmi oğulları mersûmâna ve yedişer sehmden on dört sehmi kızları mersûmetâna isâbeti tahakkukundan sonra verese-i mersûmûndan [i]bn-i mersûm İstori târîh-i i‘lâmdan dört sene mukaddem şeref-i İslâm’la müşerref ve talebiyle kendiye Ali tesmiye olunmağla sâhib-i arzuhâl merkūm Ali İstanbul Bâb Mahkemesi’nde meclis-i şer‘-i münîrde derûn-ı arzuhâlde mastûrü’l-ism olup tereke-i hâlik-i mersûma bi’l-verâse vaz‘-ı yedi mütehakkık olan mesfûr Yani zimmî muvâcehesinde mûrisimiz babamız hâlik-i mersûm Marat zimmînin bi’l-cümle terekesinde mersûm Yani zimmî vâzı‘u’l-yed olduğuna binâen tereke-i mersûmu bundan akdem âhara bey‘ edip esmânından techîz ve tekfîn ve masârıfât-ı sâiresi <<âhara>> ihrâc olundukdan sonra bâkī olan mebâliğ-i ma‘lûmeden benim ber-vech-i muharrer hisse-i irsiyeme isâbet eden üç yüz guruşu karındaşım mesfûr Yani zimmî bu def‘a işbu meclis-i şer‘de bana def‘ ü teslîm eylediğinde ben dahi yedinden bi’l-verâse ahz u kabz etmemle hâlik-i mersûmun kalîl ü kesîr celîl ü hakīr nükūd ve arûz ma‘lûm ve meçhûl bi’l-cümle ism-i mâl ıtlâk olunur terekesine ve hukūk-ı mîrâsa ve işbu târîhe gelince sâir cemî‘ hukūk-ı şer‘iyyeye müte‘allika âmme-i de‘âvîden mersûm Yani zimmî ile gāibât ani’l-meclis anam mersûme Ezmarağda ve kız karındaşlarım mersûmetân Eleniko ve Kadinko Nasrâniyelerin zimmetlerini bi’l-asâle ve bi’l-verâse kabûllerini hâvî ibrâ ve iskāt eyledim deyü ikrâr ve tasdîkleri tescîl ve huzûr-ı [âlîlerine i‘lâm olundu] Fî 14 Muharrem sene [1]256