Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 292 Hüküm no: 419 Orijinal metin no: [55b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Hasan’ın varislerinin tereke hissesi davasında sulh oldukları 275 guruşdan ibrâ kabûl Ma‘rûz Medîne-i Üsküdar’da Yeniçeşme kurbünde Evliyahoca mahallesinde sâkine iken işbu târîhden on dört sene mukaddem fevt olan Fâtıma bt. Hasan nâm hatunun verâseti zevc-i metrûku Bezzâz Mehmed b. el-Hâc Osman ile sadriye kızı Hadice Hatun bt. el-mezbûr Mehmed ve li-ebeveyn er karındaşı İsmail’e münhasıra olduğu lede’ş-şer‘i’l-enver zâhir ve mütehakkık oldukdan sonra verese-i mezbûrûndan sâhibe-i arzuhâl mu‘arrefetü’z-zât merkūme Hadice Hatun ah-ı mezbûr hâzır olduğu hâlde İstanbul Bâb Mahkemesi’nde meclis-i şer‘-i münîrde derûn-ı arzuhâlde ismi mezkûr zevc-i mezbûr Mehmed muvâcehesinde benim pederim mezbûr Mehmed zimmetinde târîh-i i‘lâmdan üç sene mukaddem mâlımdan ahz ve emriyle âhara bey‘le istihlâk eylediği bir çift elmaslıca zümrüd küpe ve sîm üzerine masnû‘ yarım elma resmi bir iğne ve bir sîm âyinenin esmânı olup makbûzu olan sekiz yüz on guruş vâlidem müteveffât-ı mezbûrenin pederim mezbûr zimmetinde cihet-i karzdan sekiz yüz guruş ve iki yüz otuz çekirdek âyineli altın kıymetinden sekiz yüz guruş ve mehr-i müeccel-i müsemmâsı olan iki yüz elli guruş ki cem‘an bin sekiz yüz elli guruş alacak hakkı olup kable’l-ahz ve’l-istîfâ vâlidem mezbûre fevt ve meblağ-ı mecmû‘-ı mezkûr benimle karındaşım hâzır-ı mezbûr ve pederim merkūma mevrûs olmağla ol vechile meblağ-ı mecmû‘-ı mezkûrdan benim hisse-i irsiyeme isâbet eden dokuz [yüz] yirmi beş guruş ki cem‘an bin yedi yüz otuz beş guruşu ben ve hâzır-ı mezbûrun hisse-i irsiyesine isâbet eden dört yüz altmış iki buçuk guruşu dahi hâzır-ı mezbûr İsmail’den her birimiz bi’l-asâle ve bi’l-verâse pederim mezbûr Mehmed’den taleb ederiz deyü hâzır-ı mezbûr İsmail’in tasdîkiyle da‘vâya tasaddî etmişidim el-hâletü hâzihî hâzır-ı mezbûr ile tasaddî eylediğimiz da‘vâ-yı mezkûrelerimizden meccânen fâriğler olmamızla bi’l-cümle zikr olunan husûslara müte‘allika da‘vâdan hâzır-ı mezbûr ile ma‘an pederim mezbûr Mehmed’in zimmetini <> ol dahi bedel-i sulh-ı sahîhden bâ-i‘lâm-ı şer‘î hâzır-ı mezbûrdan iddi‘â eylediği iki yüz yirmi beş guruş müdde‘âsından meccânen fâriğ olup meblağ-ı mezkûr iki yüz yirmi beş guruş mutâlebesine ve bi’l-cümle husûs-ı mezkûra müte‘allika da‘vâdan benim ve hâzır-ı mezbûrdan her birinin zimmetini ibrâ ve iskāt etrâfe-i selâseden her birimiz ber-vech-i muharrer âharın ibrâsını kabûl eyledik deyü ikrâr ve tasdîkleri tescîl ve huzûr-ı [âlîlerine i‘lâm olundu] Fî 2 Zilhicce sene [1]255