Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 296 Hüküm no: 425 Orijinal metin no: [56b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Süleyman’ın alacak iddiasıyla Ahmed Efendi’ye açtığı davanın reddedildiği Men‘ Ma‘rûz Vilâyet-i Anadolu’da Zağferanborlu (Safranbolu) kazâsına tâbi‘ Dağdivan karyesi ahâlîsinden sâhib-i arzuhâl Kabak Kerem oğlu es-Seyyid Süleyman b. Mehmed Salih nâm kimesne İstanbul Bâb Mahkemesi’nde meclis-i şer‘-i münîrde kazâ-i mezbûr ahâlîsinden derûn-ı arzuhâlde mezkûrü’l-ism Ahmed Efendi b. Mehmed muvâcehesinde mezbûr Ahmed Efendi târîh-i i‘lâmdan sekiz sene mukaddem kazâ-i mezbûr müteselliminin dîvân kâtibi olduğu esnâda beni bir cürmle ithâm ve bi-gayri hakkın mâlımdan altı yüz yetmiş guruşumu fuzûlî ahzetmekle meblağ-ı mezkûr altı yüz yetmiş guruşu mezbûr Ahmed Efendi’den istirdâd ederim deyü da‘vâ ettikde ol dahi cevâbında ber-vech-i muharrer ikrâr lâkin ben meblağ-ı mezkûr altı yüz yetmiş guruşun üç yüz yetmiş guruşunu nakden ve bâkīsi olan üç yüz guruşuna takāsen ve her vakıyyesi on ikişer guruşa olarak yirmi beş vakıyye kahvemi bundan akdem merkūma bey‘ ve teslîm etmemle ol vechile merkūm es-Seyyid Süleyman meblağ-ı mezkûr altı yüz yetmiş guruşu tamâmen istîfâ etmişidi deyü müdde‘î-i merkūmun inkârına mukārin eylediği def‘ini her biri mahallerinde lede’t-tezkiye adl ve makbûlü’ş-şehâde idikleri ihbâr olunan Mehmed b. Hüseyin ve Ali b. Mehmed nâm kimesneler şehâdetleriyle bi’l-muvâcehe ber-nehc-i şer‘î isbât <> etmeğin mûcebince mezbûr es-Seyyid Süleyman da‘vâ-yı mezkûresiyle merkūm Ahmed Efendi’ye bî-vech-i şer‘î mu‘ârazadan men‘ olunduğu huzûr-ı [âlîlerine i‘lâm olundu] [Fî] 4 Muharrem sene [1]256