Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 297 Hüküm no: 428 Orijinal metin no: [57a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zenci Yusuf’un eşya bedelinden alacak iddiasıyla Esirci Mısırlı Mehmed’e açtığı davanın hukuksuz bulunarak reddedildiği Ma‘rûz Rıkka inkıyâdını mukırr u mu‘terif olmağla ber-vech-i âtî da‘vâya kıbel-i şer‘den me’zûn olan Zenci Yusuf b. Abdullah nâm gulâm İstanbul Bâb Mahkemesi’nde meclis-i şer‘de mevlâsı es-Seyyid Mustafa Efendi b. Ramazan hâzır olduğu hâlde esirci tâifesinden Mısırlı Mehmed b. Ali muvâcehesinde benim mukaddemâ mevlâm olup gāib ani’l-beled Bilal Ağa beni hâzır-ı mezbûra bey‘ murâd eylediği hînde gāib-i mezbûrun bana ilbâs eylediği mecmû‘u iki yüz doksan guruş kıymetli bir battâliye ve hümâyûndan hurçlu bir yelek ve dört Hicâzî potur ve iki gömlek ve bir cellâbiye ve bir köhne cebken ve bir müsta‘mel şal ve bir bohçayı mezbûr Mehmed yedine li-ecli’l-hıfz îdâ‘ ile teslîm etmişidim el-hâletü hâzihî gāib-i mezbûr târîh-i i‘lâmdan yirmi gün mukaddem mezbûr es-Seyyid Mustafa Efendi’ye bey‘ edip lâkin eşyâ-i mezkûre merkūm Mehmed’in yedinde kalmağla mevcûd ise aynlarını müstehleke ise kıymet-i mezkûrelerini mezbûr Mehmed’den taleb ederim deyü tasaddî eylediği da‘vâsı meşrû‘a ve iltifâta şâyân olmadığı mezbûr Yusuf’a tefhîm olunduğu mübâşirleri Bâb-ı Seraskerî kavaslarından Yüzbaşı İsmail Kavas kulları yediyle huzûr-ı [âlîlerine i‘lâm olundu] [Fî] 25 Zilhicce sene [1]255