Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 298 Hüküm no: 429 Orijinal metin no: [57a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hırvat Marko’nun Ahmed Ağa’ya açtığı alacak davasında sulh olup zimmet ibrası yaptığı Ma‘rûz Hırvat tâifesinden derûn-ı arzuhâlde ismi mastûr Marko v. Covan nâm zimmî İstanbul Bâb Mahkemesi’nde meclis-i şer‘-i münîrde sâhib-i arzuhâl Ahmed Ağa b. el-Hâc İbrahim nâm kimesne muvâcehesinde ben bundan akdem merkūm Ahmed Ağa’nın İstanbul’da Drağman kurbünde Tercümanyunus mahallesinde vâki‘ mutasarrıf olduğu bir kıt‘a arsasının ma‘lûmü’l-mikdâr mahâllini kirizma etmemle işbu yedimde olup bir kıt‘a keşif mikdârı nâtık olduğu üzere merkūm Ahmed Ağa’nın bi-şartı’r-rücû‘ emriyle masrûfum olarak bi’l-mürâca‘a alacak hakkım olan altı yüz otuz sekiz guruşun üç yüz guruşunu mukaddemâ kabz etmemle bâkīsi olan üç yüz otuz sekiz guruşu merkūm Ahmed Ağa’dan taleb ederim deyü tasaddî eylediğim da‘vâmdan bâ-tavassut-ı muslihîn merkūm Ahmed Ağa ile bi’t-tav‘ ve’r-rızâ yüz seksen guruş bedel-i medfû‘ ve makbûza ba‘de akdi’l-musâlahati ve’l-kabûl mâ‘adâ ziyâde müdde‘âma ve bi’l-cümle husûs-ı mezkûra müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü ikrâr ve tasdîkleri huzûr-ı [âlîlerine i‘lâm olundu] Fî 22 Şa‘bân sene [1]255