|
Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 122 Hüküm no: 107 Orijinal metin no: [22a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Karahisar kazası Yenice köyü camii hatibi İsmail b. Mehmed’in görevini Mehmed İzzet b. Mehmed’e devretmesi
Ma‘rûz,
Karahisar-ı şarkî? kazâsına tâbi‘ Yenice karyesinde vâki‘ el-Hâc Osman nâm sahibü’l-hayrın binâ eylediği câmi‘-i şerîfde yevmî nîm akçe vazîfe ile hitâbet-i dîniye ve hitâbet-i mezkûreye meşrûta olan karye-i mezbûre sınırından hana dahî? ve Şeyh Vakfı iki müdlük beratla Dandakebükü? nâm karye Karaköy çiftliği ve Yave çiftliği mezrâ‘ası nâm vakıf yerlerde öşr-i mahsûsuyla hitâbet-i mezkûre ciheti İsmail b. Mehmed’in üzerinde olduğu asâkir rûznâmçesinden derkenâr olunmağla istid‘â ve derkenâra nazaran muktezâsı i‘lâm olunmak bâbında sâdır olan fermân-ı âlîşâna imtisâlen cihet-i mezkûra mutasarrıf idiği derûn-ı arzuhâlde ismi mezkûr Mehmed İzzet b. Mehmed dâ‘îlerinin dahi erbâb-ı istihkākdan olduğu karye-i mezbûre ahâlîsinden bu esnâda Âsitâne-i aliyye’ye gelen bî-garaz erbâb-ı vukūfdan Osman Efendi b. Hüseyin ve Mehmed Besim Efendi b. Tahir nâm kimesnelerin alâ-tarîkı’ş-şehâde ihbâr ile zâhir olan mezbûr İsmail mutasarrıf olduğu hitâbeti hüsn-i rızâ ve tayyib-i hâtır ile merkūm Mehmed İzzet b. Mehmed’e fâriğ ve kasr-ı yed ve yedinde olan iki kıt‘a atîk beratını teslîm etmekle ve hitâbet-i mezkûreye meşrûta sâlifü’z-zikr vakıf yerlerin öşr-i ma‘lûme sûretde fâriğ-i mezbûrun kasr-ı yedinden merkūm Mehmed İzzet b. Mehmed’e tevcîh ve atîk beratı eyâleti? kaleminde battala hıfz olunarak yedine müceddeden iki kıt‘a berat-ı şerîf-i âlîşân sadaka ve ihsân buyurulmak muktezâ-yı hâl idiği huzûr.
Fî 4 N sene [12]49
|