.:: İstanbul Kadı Sicilleri ::.


Anadolu Sadareti Mahkemesi 1 Numaralı Sicil (H. 1247-1250/ M. 1831-1834)
cilt: 93, sayfa: 122
Hüküm no: 108
Orijinal metin no: [22a-4]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Tuht nâhiyesi Sarıkaya köyü camii hatibi Halil b. Osman’ın vefatıyla yerine oğulları Mehmed Tahir ve Osman’ın tayin edilmesi

Ma‘rûz,

Sâdır olan fermân-ı âlîlerine imtisâlen medîne-i Tuht nâibi Kâtibzâde es-Seyyid Mehmed Esad Efendi dâ‘îlerinin işbu mühr-i mutâbıkı bir kıt‘a i‘lâmına ve hâmişinde mastûr derkenâra nazar olundukda kazâ-i merkūma tâbi‘ Sarıkaya karyesinde vâki‘ Ali Efendi nâm sahibü’l-hayrın binâ ve ihdâs eylediği câmi‘-i şerîfinde ber-vech-i hasbî hatîb olan Halil b. Osman fevt olup yeri hâlî ve hizmet-i lâzımesi mu‘attal kalmağla müteveffâ-yı merkūmun mahlûlünden sulbî oğulları Mehmed Tahir ve Osman nâm karındaşlara bi’l-iştirâk üzerlerine tevcîh olunması nâib-i mûmâ-ileyhin i‘lâmından müstefâd olup fi’l-hakīka hitâbet-i mezkûre ber-vech-i hasbî mezbûr Halil b. Osman’ın üzerinde olduğu derkenârdan müstebân ve merkūm Halil’in fevti vâki‘, merkūmân Mehmed Tahir ve Osman sulbî sahîh oğulları olduklarını karye-i mezbûre ahâlîsinden vukūf nâzırı olan talebe-i ulûmdan Halil Efendi b. Hasan ve Mahmud b. Ahmed nâm kimesnelerin alâ-tarîkı’ş-şehâde haber vermeleriyle cihet-i mezkûre pederleri müteveffâ-yı merkūmun mahlûlünden merkūmân [Mehmed Tahir] ve Osman ibney Halil nâm karındaşlara ber-vech-i iştirâk tevcîh ve yedlerine bir kıt‘a berat-ı şerîf-i âlîşân sadaka ve ihsân buyurulmak iktizâ eylediği huzûr.

Fî 11 Ra sene [12]49