Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 298 Hüküm no: 430 Orijinal metin no: [57a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kömürcü Mehmed’in Şekerci İbrahim’e açtığı alacak davasında haksız bulunduğu Ma‘rûz Kömürcü esnâfından Mehmed b. Ahmed nâm kimesne İstanbul Bâb Mahkemesi’nde meclis-i şer‘de İstanbul’da Alacahamam kurbünde Çelebioğlu Alâeddin mahallesinde vâki‘ şekerci dükkânında sâkin şekerci esnâfından İbrahim b. Mehmed nâm kimesne muvâcehesinde ben ücret ile hizmet eder makūleden olup merkūmun talebiyle bin iki yüz elli dört senesi Şa‘bânü’l-mu‘azzamı gurresinden sene-i mezbûre Zilka‘detü’ş-şerîfesi gāyetine gelince dükkân-ı mezkûrda ücret kavlinsiz dört ay hizmet ve ba‘dehu müfârakat etmemle müddet-i mezkûrede müstahık olduğum ecr-i mislimi merkūm İbrahim’den hâlâ taleb ederim deyü da‘vâ ettikde ol dahi cevâbında ikrâr lâkin müdde‘î-i mezbûr Mehmed benim yanımdan hîn-i müfârakatinde ecr-i misli mukābelesinde mâlımdan dört yüz elli guruş merkūm Mehmed’e teslîm eylediğimde ol dahi ba‘de’l-kabz ziyâde ecr-i misli mutâlebesine ve sâir beynimizde cereyân eden cemî‘ ahz ü i‘tâya müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt etmişidik deyü müdde‘î-i merkūmun inkârına mukārin eylediği def‘ ve ibrâ-i âm müdde‘âsını her biri lede’t-tezkiye adl ve makbûlü’ş-şehâde idikleri ihbâr olunan Şekerci İsmail Ağa b. Hasan ve Osman Ağa b. Mehmed ve İbrahim Ağa b. Mehmed ve Süleyman Ağa b. Süleyman nâm kimesneler şehâdetleriyle bi’l-muvâcehe ber-nehc-i şer‘î isbât etmeğin mûcebince müdde‘î-i mezbûr Mehmed da‘vâ-yı mezkûresiyle merkūm İbrahim’e bî-vech-i şer‘î mu‘ârazadan men‘ olunduğu mübâşirleri Yusuf Kavas [yediyle] huzûr-ı [âlîlerine i‘lâm olundu] Fî 17 Muharrem sene [12]56