Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 299 Hüküm no: 431 Orijinal metin no: [57b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manifaturacı Dimitri’ye borcu olan Anaştaş’ın borcunu ödemesi 3398 guruş hüküm Ma‘rûz Malifaturacı tüccârından hâmil-i i‘lâm Dimitri v. Yanko nâm zimmî İstanbul Bâb Mahkemesi’nde meclis-i şer‘-i hatîrde Anaştaş v. Nikola nâm zimmî muvâcehesinde mersûm Anaştaş zimmî zimmetinde yedimde olup târîh-i İseviyye’nin bin sekiz yüz otuz dokuz senesi Ağustosu’nun dokuzuncu günü târîhiyle müverrah Rûmiyyü’l-imlâ bir kıt‘a temessük mantûkunca mâlımdan ve yedimden iştirâ ve kabz eylediği malifatura ta‘bîr olunur top ve fiâtı beynimizde ma‘lûm basma ve tülbent esmânından ba‘de külli’l-hesâb beş bin yüz doksan sekiz guruş alacak hakkımın bin sekiz yüz guruşunu zahr-ı temessük mantûkunca mukaddemâ kabz ve istîfâ etmemle bâkīsi olan üç bin üç yüz doksan sekiz guruşu mesfûr Anaştaş zimmîden hâlâ taleb ederim deyü da‘vâ ettikde ol dahi cevâbında kaziyye minvâl-i muharrer üzere olduğunu ikrâr ü i‘tirâf etmeğin mûcebince meblağ-ı bâkī-i mezkûr üç bin üç yüz doksan sekiz guruşun müdde‘î-i mersûm Dimitri zimmîye edâsıyla mersûm Anaştaş zimmî ilzâm olunduğu bi’l-iltimâs huzûr-ı [âlîlerine i‘lâm olundu] Fî 26 Muharrem sene 1256.