Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 299 Hüküm no: 432 Orijinal metin no: [57b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Apostol ile Halime Hanım’ın ortak oldukları bakkal dükkânını nöbetleşerek tasarruf etmek üzere anlaştıkları Bakkāl dükkânı muhâyâsı Ma‘rûz-ı dâ‘î-i devlet-i aliyyeleridir ki Bakkāl tâifesinden arzuhâl eden Apostol v. Yuvan nâm zimmî İstanbul Bâb Mahkemesi’nde meclis-i şer‘-i hatîrde Havâss-ı Refî‘a kazâsına muzâfe kasaba-i Hasköy’de Turşucu mahallesinde sâkine derûn-ı arzuhâlde mezkûretü’l-ism Halime bt. Abdullah nâm hatunun zevci ve tarafından husûs-ı âti’l-beyânda vekîl olduğu zâtını ârifân Mehmed Ağa b. İsmail ve es-Seyyid Feyzullah Ağa b. Hasan nâm kimesneler şehâdetleriyle ber-nehc-i şer‘î sâbit olan Kaşıkçı es-Seyyid Ahmed b. es-Seyyid Mustafa nâm kimesne muvâcehesinde kasaba-i mezbûrede Kışlak Meydanı nâm mahâlde kâin Haremeyn Dükkânı demekle arîf bir bâb bakkāl dükkânı derûnunda mevcûde beyne’l-esnâf gedik ta‘bîr olunur vakıf âlât-ı lâzıme-i ma‘lûmenin nısf hisse-i şâyi‘ası benim ve nısf hisse-i uhrâsı müvekkile-i mezbûre Halime Hatun’un iştirâken ve şâyi‘an taht-ı tasarrufumuzda olmağla nısf hisse-i mezkûremi mühâyâten tasarrufa tâlib olmamla işbu sene-i mübâreke yani bin iki yüz elli altı senesi Muharremi’l-harâmı gurresinden bin iki yüz elli sekiz senesi Zilhiccetü’ş-şerîfesi gāyetine gelince üç sene müstakıllen ben ve ba‘dehu vech-i meşrûh üzere üç sene dahi müvekkile-i mezbûre Halime Hatun müstakılleten mutasarrıfe olmak üzere her birimiz bi’t-terâzî akd-i muhâyâ eyledik deyü mukırr-ı mersûm Apostol zimmînin bi’l-cümle takrîr-i meşrûhunu vekîl-i mezbûr es-Seyyid Ahmed tasdîk ve muhâyâ-i mezkûreyi bi’l-vekâle kabûl eylediğini huzûr-ı âlîlerine i‘lâm olundu. Fî-gurreti Muharrem sene [1]256