Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 300 Hüküm no: 434 Orijinal metin no: [57b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Neccar Toros’un Emine Hatun’da olan alacağının taksitler halinde ödenmesini kabul ettiği 800 guruş sekiz yüz guruş te’cîl Ma‘rûz Neccâr tâifesinden Toros v. Ağya nâm zimmî İstanbul Bâb Mahkemesi’nde meclis-i şer‘de İstanbul’da Kumkapı kurbünde Nişancı Mehmedpaşa mahallesinde sâkine mu‘arrefetü’z-zât Emine bt. Halil nâm hatun muvâcehesinde ben bundan akdem mezbûre Emine Hatun’un mahalle-i mezbûrede vâki‘ mutasarrıfe olduğu bir bâb menzilinin iktizâ eden ta‘mîr ve termîmine bi-şartı’r-rücû‘ emriyle mâlımdan masrûfum olup bi’l-mürâca‘a alacak hakkım olan sekiz yüz guruşu mezbûre Emine Hatun’un hâlen ve def‘aten bana bir vechile edâya iktidârı olmayıp ber-vech-i âtî te’cîle tâlib olduğunda ben dahi beher şehr kırk guruş verip mecmû‘unu târîh-i i‘lâmdan yirmi ay tamâmına değin tamâmen bana edâ ve îfâ etmek üzere rızâmla medyûne-i merkūme Emine Hatun’u te’cîl ve taksît eyledim deyü mukırr-ı mersûm Toros zimmînin bi’l-cümle takrîr-i meşrûhunu mezbûre Emine Hatun tasdîk ve deyn-i meblağ-ı mezkûru [58a] ikrâr u i‘tirâf ve ber-vech-i muharrer müeccelen ve mukassaten dâyini mersûm Toros zimmîye edâya ve teslîme ta‘ahhüd eylediği huzûr-ı [âlîlerine i‘lâm olundu] [Fî] 15 Zilhicce sene [1]255