Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 302 Hüküm no: 436 Orijinal metin no: [58a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Celo’nun Tütüncü Mato’ya olan borcunu ödemesi 1035 guruş hüküm Ma‘rûz Tütüncü tâifesinden Mato v. Todori nâm zimmî İstanbul Bâb Mahkemesi’nde meclis-i şer‘de yine tâife-i <> merkūmeden Celo v. Yuvan nâm zimmî muvâcehesinde mersûm Celo zimmî işbu târîhden beş sene mukaddem Rumeli’de Kızanlık kazâsında çarşı derûnunda vâki‘ ma‘lûmü’l-hudûd bir bâb mülk tütüncü mağazasını bana bey‘ etmek için mersûm Celo zimmîye bin otuz beş guruş teslîm eylediğimde ol dahi ba‘de’l-kabz lâkin mersûm Celo zimmî mağaza-i mezkûreyi bana bey‘ etmeyip âhara bey‘ etmekle semen nâmıyla mersûm Celo zimmîye medfû‘um olan meblağ-ı mesfûr bin otuz beş guruşu mersûm Celo zimmîden istirdâd ederim deyü ba‘de’d-da‘vâ ve’l-istintâk ol dahi cevâbında kaziyye minvâl-i muharrer üzere olduğu[nu] bi-tamâmihâ tâyi‘an ve kat‘iyyen ikrâr etmeğin alâ-mûcibi ikrârihi meblağ-ı mezkûr bin otuz beş guruşu müdde‘î-i mesfûr Mato zimmîye red ve teslîme mersûm Celo zimmîye tenbîh olunduğu tescîl ve bi’l-iltimâs huzûr-ı [âlîlerine i‘lâm olundu] [Fî] 27 Muharrem sene [1]256