Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 302 Hüküm no: 437 Orijinal metin no: [58a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Erzincan ahalisinden Abdurrahman, İbrahim ve diğerlerinin Mihmanoğlu Bedros’a verdikleri paradan kalan kısmını geri vermesi talebiyle açtıkları davada haksız bulundukları [18000] guruş mu‘ârazadan men‘ Ma‘rûz [Vilâyet-i] Anadolu’da Erzurum sancağına tâbi‘ Erzincan kazâsı ahâlîlerinden kayıkçı esnâfından Kara Veli oğlu es-Seyyid Abdurrahman Ağa b. es-Seyyid Halil ve Emin b. İshak ve es-Seyyid Hüseyin b. es-Seyyid Hasan ve es-Seyyid İbrahim b. es-Seyyid Mustafa ve es-Seyyid İbrahim b. Salih ve Hurşid b. Süleyman ve Hasan b. Mehmed nâm kimesneler İstanbul Bâb Mahkemesi’nde meclis-i şer‘-i münîrde kazâ-i mezbûr re‘âyâsından Mihmanoğlu Bedros v. Todoros nâm zimmî muvâcehesinde bundan akdem kazâ-i mezbûr voyvodası olan gāib ani’l-meclis Ahmed Bey nâm kimesneyi azlettirmek için kazâ-i mezbûr vücûhları ve sâirleri mesfûr Bedros zimmîyi taraflarından tevkîl eylediklerinde biz dahi mesfûr zimmînin tâlibinsiz üç mâh Âsitâne-i seniyye’de husûs-ı mezkûr zımnında zimmî-i mersûm ile ma‘an sa‘y edip voyvoda-i mezbûr Ahmed Bey voyvodalıkdan azl ve yerine âharı nasb olunmuşidi el-hâletü hâzihî mesfûr Bedros zimmî ahâlî-i merkūmun mâllarından îcâb eden mahallere sarf için ahzeylediği meblağ-ı ma‘lûmeden on sekiz bin guruş zimmetinde kaldığı mesmû‘umuz olmağla öyle olacak meblağ-ı mezkûrumuzu teşrîk etmek ve yâhûd ecr-i mislimizi bize <> vermek üzere mesfûr Bedros zimmîye cebr olunsun deyü takrîr-i meşrûhları üzere tasaddî eyledikleri da‘vâları meşrû‘a ve iltifâta şâyân olmadığı müdde‘î-i merkūmûna tefhîm ve da‘vâ-yı mezkûresiyle mesfûr Bedros zimmîye bî-vech-i şer‘î mu‘ârazadan men‘ olunduğunu <<İstanbul Mahkemesi’nden>> huzûr-ı [âlîlerine i‘lâm olundu] Fî 29 Muharrem sene [1]255 [1256]