Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 304 Hüküm no: 440 Orijinal metin no: [58b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Hatice Hatun’un Şerife Zeliha Hatun’dan satın aldığı cariyenin hastalıklı olduğu iddiasıyla açtığı davayı ispat edemediği Mu‘ârazadan men‘ Ma‘rûz Sâhibe-i arzuhâl mu‘arrefetü’z-zât Şerife Hadice bt. es-Seyyid Mehmed nâm hatun İstanbul Bâb Mahkemesi’nde meclis-i şer‘-i münîrde derûn-ı arzuhâlde mezkûretü’l-ism kezâlik zâtı mu‘arrefe Şerife Zeliha bt. es-Seyyid Ahmed nâm hatun muvâcehesinde Esirci Ali Ağa b. Mustafa nâm kimesne <> hâzır olduğu hâlde işbu târîh-i i‘lâmdan altı ay mukaddem cemî‘ uyûbdan sâlime olmak üzere <> hâzır-ı merkūm Ali Ağa’nın delâletiyle merkūme Şerife Zeliha Hatun’un mâlından ve yedinden iki bin guruş semen-i medfû‘ ve makbûza iştirâ ve kabz eylediğim işbu hâzıra bi’l-meclis bir re’s zenciye câriyenin <> ahbes hayfından? başı batnı şiş olup ve ol vechile mu‘ayyebe ve ayb-ı mezkûr câriye-i mezbûrede şirâ târîhinden kadîm ve inde’t-tüccâr noksân-ı semen îcâb eder uyûbdan olmağla câriye-i mezbûreyi yedimden ahz birle semen nâmıyla medfû‘um olan meblağ-ı mezkûr iki bin guruşu bana redd ü teslîme merkūme Şerife Zeliha Hatun’a tenbîh olunmak matlûbumdur deyü teveccüh-i husûmet olundukdan sonra da‘vâ ettikde mezbûre Şerife Zeliha Hatun cevâbında câriye-i merkūmeyi ol mikdâr guruş semen-i makbûza cemî‘ uyûbdan sâlime olmak üzere müdde‘iyye-i mezbûreye ikrâr lâkin illet-i mezkûrenin şirâ târîhine nazaran kıdemini inkâr etmekle müdde‘iyye-i mezbûre câriye-i merkūmeden illet-i mezkûrenin kıdemini isbâtdan ızhâr-ı acz edip istihlâf ettikde merkūme Şerife Zeliha Hatun bi’l-muvâcehe ber-nehc-i şer‘î tahlîf olunmağın mûcebince müdde‘iyye-i mezbûre Şerife Hadice Hatun’a da‘vâ-yı mezkûresiyle merkūme Şerife Zeliha Hatun’a bilâ-beyyine [mu‘ârazadan] men‘ olunduğu huzûr-ı [âlîlerine i‘lâm olundu] [Fî] 6 Muharrem sene [1]256