Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 305 Hüküm no: 442 Orijinal metin no: [59a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Hasan’ın borcuna verilmek üzere Kabril’e teslim ettiği paranın geri verilmesi talebiyle açtığı davada haksız bulunduğu 1100 guruş bî-vech-i şer‘î mu‘ârazadan men‘ Ma‘rûz Bâ‘isü’l-i‘lâm es-Seyyid Hasan b. İsmail nâm kimesne İstanbul Bâb Mahkemesi’nde meclis-i şer‘de Kabril v. Mıgırdıç nâm zimmî muvâcehesinde benim Anadolu’da medîne-i Sivas’da mütemekkin İstefan zimmîye zimmetimde cihet-i karzdan bin yüz guruş deynim olmağla bundan akdem mersûm Kabril zimmî ben meblağ-ı mezkûru benden taleb ve ahz u kabza ve makbûzu dâyin-i gāib-i mersûm tarafından vekîlim deyü meblağ-ı mezkûru benden mutâlebe eylediğinde ve ben dahi tasdîk edip meblağ-ı mezkûru mersûm Kabril zimmîye edâ ve teslîm etmişidim lâkin ben meblağ-ı mezkûru mersûm Kabril zimmîye edâ ve teslîm eylediğime nâdim ve peşîmân olmamla öyle olacak meblağ-ı mezkûru mersûm Kabril zimmîden istirdâd ederim deyü takrîr-i meşrûhu üzere tasaddî eylediği da‘vâsı meşrû‘a ve iltifâta şâyân olmadığı kendiye tefhîm ve da‘vâ-yı mezkûresiyle mersûm Kabril zimmîye bî-vech-i şer‘î mu‘ârazadan men‘ olunduğu huzûr-ı [âlîlerine i‘lâm olundu] [Fî] 29 Muharrem sene [1]256