Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 307 Hüküm no: 447 Orijinal metin no: [59b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Sıddıka Hanım’ın kardeşi İbrahim Edhem Efendi ile ortak oldukları evi nöbetleşe tasarruf etmek üzere anlaştıkları Menzil muhâyâsı Ma‘rûz Bâ‘isetü’l-i‘lâm mu‘arrefetü’z-zât Âişe Sıddıka Hanım bt. Mehmed Raşid İstanbul Bâb Mahkemesi’nde meclis-i şer‘-i münîrde li-ümmin er karındaşı İbrahim Edhem Efendi b. Hafız İbrahim nâm kimesne [muvâcehesinde] İstanbul’da Çırçır kurbünde Harâccı Muhyiddin mahallesinde kâin ma‘lûmü’l-hudûd ve’l-müştemilât kābil-i kısmet olmayan bir bâb vakıf menzilin nısf hisse-i şâyi‘ası benim ve nısf hisse-i şâyi‘ası mezbûr İbrahim Edhem Efendi’nin ale’l-iştirâki’s-seviyy taht-ı tasarrufumuzda iken karındaşım mezbûr İbrahim Edhem Efendi benim iznim olmaksızın birkaç seneden beri menzil-i mezkûrda müstakıllen sâkin olmağla ben dahi ol kadar sâkine olmak üzere menzil-i mezkûru bana teslîme karındaşım merkūma tenbîh olunmak matlûbumdur deyü tasaddî eylediğim da‘vâm müvecceh ve mültefit olmadığı bana ba‘de’t-tefhîm tavassut-ı muslihîn ile beynimiz tanzîm olunup menzil-i mezkûru işbu târîhden evvelen bir sene ben ve ba‘dehu bir sene karındaşım merkūm İbrahim Edhem Efendi zabt ü tasarruf etmek üzere akd-i muhâyâ eyledik deyü ikrâr ve tasdîkleri huzûr-ı [âlîlerine i‘lâm olundu] Fî 2 S sene [12]56