Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 309 Hüküm no: 451 Orijinal metin no: [60a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abraham’a borcu olan Aşçı Ağyazar’ın borcunu ödemesi 767,5 [769,5] guruş ilzâm Ma‘rûz Arzuhâl eden Abraham v. Ağyazar zimmî İstanbul Bâb Mahkemesi’nde meclis-i şer‘-i hatîrde aşçı tâifesinden Ağyazar v. Canik nâm zimmî muvâcehesinde mersûm Ağyazar zimmî zimmetinde bundan akdem mâlımdan ve yedimden iştirâ ve kabz eylediği ma‘lûmü’l-vezn ve’l-fiyat mazı semeninden bin seksen guruş alacak hakkımın üç yüz on buçuk guruşunu takāsen bana mâlından beher topu on üçer buçuk guruşa olarak yirmi üç top çit bey‘ ve teslîm ben dahi yedinden ahz u kabz ve ol vechile üç yüz on buçuk guruşunu istîfâ etmemle bâkīsi olan yedi yüz yirmi [dok] dokuz buçuk guruşu mersûm Ağyazar zimmîden hâlâ taleb ederim deyü da‘vâ ettikde ol dahi cevâbında ber-vech-i muharrer ikrâr lâkin müdde‘î-i mesfûrun kabzını mu‘terif olduğu yirmi üç top çitden mâ‘adâ beher topu kezâlik on üçer buçuk guruşa olmak üzere elli yedi top çit dahi bey‘ ve teslîm ve semeni olan meblağ-ı mezkûr yedi yüz altmış dokuz buçuk guruşu deynim olan meblağ-ı bâkī-i mezkûr yedi yüz altmış dokuz buçuk guruşa bi’t-terâzî takās ve mahsûb etmemizle ol vechile meblağ-ı mezkûrdan zimmetim berî olmuşdur deyü müdde‘î-i mersûmun inkârına mukārin eylediği def‘ine ikāmet-i beyyine edemeyip bi’t-taleb mersûm Abraham zimmî bi’l-muvâcehe ber-nehc-i şer‘î tahlîf olunmağın mûcebince dâfi‘-i mersûm Ağyazar zimmî def‘-i mezkûruyla mesfûr Abraham zimmîye bilâ-beyyine mu‘ârazadan ba‘de’l-men‘ mersûm Ağyazar zimmînin sâlifü’l-beyân ikrârı[yla] lâzım gelen meblağ-ı bâkī yedi yüz altmış dokuz buçuk guruşu müdde‘î-i mersûm Abraham zimmîye edâya mesfûr Ağyazar zimmîye tenbîh olunduğu huzûr-ı [âlîlerine i‘lâm olundu] [Fî] 20 Şa‘bân sene 1255.