Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 314 Hüküm no: 459 Orijinal metin no: [61a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Meryem Nasraniyenin babasından intikal eden iki bağ ve zeytin ağaçlarını zapt ettiği iddiasıyla Agop’a açtığı davanın Kocaeli’nde görülmesine karar verildiği Kocaeli sancağında bağ nizâ‘ı ve eşcâr [Ma‘rûz] [Vilâyet-i] Anadolu’da Kocaeli sancağına tâbi‘ Pazarköyü kazâsında vâki‘ Keramet nâm karye re‘âyâsından olup bin iki yüz on dört senesinde hâlik olan Akbacakoğlu Simyon v. Atam zimmînin verâseti karye-i mezbûrede mütemekkinler zevce-i metrûkesi Tekohi bt. Atam Nasrâniye ile sulbî kebîr oğlu Ohannes ve sulbiye kebîre kızları Oskohi ve Âsitâne-i aliyye’de mütemekkine Sogomon nâm-ı diğer Meryem Nasrâniyelere inhisârı tahakkukundan sonra verese-i mersûmeden sâhibe-i arzuhâl mu‘arrefetü’z-zât mesfûre Sogomon nâm-ı diğer Meryem Nasrâniye İstanbul Bâb Mahkemesi’nde meclis-i şer‘de karye-i mezkûre re‘âyâsından derûn-ı arzuhâlde mastûrü’l-ism olup bâ-mektûb-ı sâmî-i hazret-i sadrıa‘zamî ihzâr olunan Agop v. Serapyon nâm zimmî muvâcehesinde zikr olunan Keramet karyesi sınırı dâhilinde vâki‘ her biri ma‘lûmü’l-hudûd iki kıt‘a kürûmu mülk bağ ve mevâzi‘-i adîdede kâin sekiz sâk zeytin eşcârı babam mûrisimiz hâlik-i mersûm Simyon zimmînin sağlığında ile’l-helâk müstakıllen yedinde mülkü olup ba‘de helâkihi benimle verese-i mersûmesine mevrûs oldukdan sonra babam hâlik-i mersûmun hîn-i helâkinde ben karye-i mezkûrede mevcûde olmadığım ecilden zikr olunan iki kıt‘a bağ ve sekiz sâk zeytin eşcârı babam hâlik-i mesfûrun bi’l-cümle terekesinden ancak benim hisse-i irsiyem için bi’t-terâzî ifrâz olunmağla mârru’z-zikr iki kıt‘a bağ ve eşcâr benim yedimde mülküm iken mersûm Agop zimmî fuzûlî zabt ve vaz‘-ı yed etmekle keff-i yed birle mahâllinde bana teslîme mersûm Agop zimmîye tenbîh olunmak matlûbumdur deyü da‘vâ ettikde ol dahi cevâbında müdde‘iyye-i mersûmenin iddi‘â eylediği iki kıt‘a kürûmu mülk bağlara karye-i mezkûre re‘âyâsından Çakıroğlu David v. Asador <> ve Aci Kirkor ve Markar ve Arakil ve Mardiros evlâ[d-ı] Aci Sahak zimmîler vâzı‘u’l-yed olup zikirleri mürûr eden sekiz sâk eşcârdan ancak üç sâk zeytin eşcârı babam olup işbu târîhden otuz sene mukaddem hâlik olan Serapyon zimmîden mevrûs yedimde mâlım olmağla ol vechile ancak üç sâk zeytin eşcârına bi-hakkın vaz‘-ı yed ederim deyip bu sûretde husûs-ı mezkûr mahâllinde münâza‘un-fîh olan eşcâr irâe ve işâ‘a olunarak terâfu‘-ı şer‘ olunmak iktizâ eylediği tarafeyne tefhîm olunduğu huzûr-ı [âlîlerine i‘lâm olundu] Fî 8 Şevvâl sene [12]55