Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 315 Hüküm no: 460 Orijinal metin no: [61b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Miho zimmînin kefaletten olan borcunu Eskici Panos’a ödemesi 375 [675] guruş [hüküm] [Ma‘rûz] Eskici tâifesinden arzuhâl eden Panos v. Markas nâm zimmî İstanbul Bâb Mahkemesi’nde meclis-i şer‘-i hatîrde Ayvaz tâifesinden derûn-ı arzuhâlde mastûrü’l-ism Miho v. Kirhor nâm zimmî muvâcehesinde Melkon v. Avadik nâm zimmî hâzır olduğu hâlde benim hâzır-ı mersûm zimmetinde cihet-i deyn-i şer‘îden alacak hakkım olan altı yüz yetmiş beş guruşa Miho zimmî bundan akdem tarafeynden bi’l-emr ve’l-kabûl kefâlet-i mutlaka-i sahîha-i şer‘iyye ile kefîl ve dâmin olmağla meblağ-ı mezkûru zimmî-i mersûmdan kefâlet-i mahkiyesine binâen hâlâ taleb ederim deyü da‘vâ ettikde ol dahi cevâbında ber-vech-i muharrer ikrâr lâkin asıl-ı hâzır-ı mersûm Melkon zimmî deyni olan meblağ-ı mezkûr altı yüz yetmiş beş guruşu târîh-i i‘lâmdan on gün mukaddem mersûm Panos zimmîye tamâmen edâ ve teslîm etmişidim deyü hâzır-ı mersûmun tasdîkiyle eylediği def‘ine ikāmet-i beyyine edemeyip bi’t-taleb mersûm Panos zimmîye bi’l-muvâcehe vech-i şer‘î üzere yemîn verilmeğin mûcebince dâfi‘-i mersûm Miho zimmî def‘-i mezkûruyla mersûm Panos zimmîye bilâ-beyyine mu‘ârazadan ba‘de’l-men‘ mersûm Miho zimmînin sâlifü’l-beyân ikrârıyla lâzım gelen meblağ-ı mezkûr altı yüz yetmiş beş guruşu müdde‘î-i mersûm Panos zimmîye bi-hükmi’l-kefâle edâ ve teslîmiyle mersûm Miho zimmîye tenbîh olunduğu huzûr-ı [âlîlerine i‘lâm olundu] Fî 5 S sene [12]56