Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 318 Hüküm no: 465 Orijinal metin no: [62a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hibetullah Hanım’ın yanında bulunan torunu Mehmed için babası Mehmed Raşid Ağa’nın ödemesi şartıyla nafaka takdir edildiği Ceddesi üzerine nafaka 40 guruş Ma‘rûz İstanbul’da Sulumanastır kurbünde Sancakdârhayreddin mahallesinde sâkine sâhibe-i arzuhâl mu‘arrefetü’z-zât Hibetullah bt. Ahmed nâm hatun İstanbul Bâb Mahkemesi’nde meclis-i şer‘-i münîrde ba‘demâ dâmadı derûn-ı arzuhâlde mezkûrü’l-ism Mehmed Raşid Ağa b. Halil nâm kimesne muvâcehesinde merkūm Mehmed Raşid Ağa’nın sadriye kızım gāibetü ani’l-meclis Emine bt. Hüseyin nâm hatun ile mukaddemâ zevciyyet beynlerinde kāime iken mezbûrun firâşından hâsıl ve kızım gāibe-i merkūmeden mütevellid sulbî oğlu Mehmed nâm sagīr kızım gāibe-i merkūmenin bi-hakkı’l-hıdâne hacr ü terbiyesinde iken kızım gāibe-i merkūme bu def‘a nefsini sagīr-i mezbûra ecnebî olan kimesneye tezvîc ve ol vechile hakku’l-hıdâne kendiden sâkıta ve bana intikāl edip lâkin sagīrin mâlı olmayıp nafaka ve kisveye eşedd-i ihtiyâc ile muhtâc olmağla nafakasi’çün babası mezbûr <<üzer>> üzerine kıbel-i şer‘den kadr-ı ma‘rûf nafaka farz ve takdîr olunmak bi’l-hıdâne matlûbumdur dedikde ol dahi ba‘de’t-tasdîk sagīrin nafakasi’çün babası mezbûr üzerine işbu târîh-i i‘lâmdan beher şehr kırkar guruş farz ve takdîr olunup meblağ-ı mefrûz-ı mezkûru sagīrin nafaka ve kisve ve sâir levâzım-ı zarûriyesine harc ü sarfa ve lede’l-iktizâ istidâneye ve inde’z-zafer babası mezbûr Mehmed Raşid Ağa üzerine rücû‘a ceddesi ve hâzınesi mezbûre Hibetullah Hatun’a kıbel-i şer‘den izin verildiği huzûr-ı [âlîlerine i‘lâm olundu] Fî 6 S sene [12]56