.:: İstanbul Kadı Sicilleri ::.


Anadolu Sadareti Mahkemesi 1 Numaralı Sicil (H. 1247-1250/ M. 1831-1834)
cilt: 93, sayfa: 124
Hüküm no: 111
Orijinal metin no: [22b-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Besni kazasındaki Sûk-ı Sultânî mescidi vakfının gelirlerine yapılan müdahalenin önlenmesi

Sâdır olan fermân-ı âlîlerine imtisâlen işbu arzuhâl [ve] derkenârlara ba‘de’n-nazar Besihni [Besni] kazâsın[da] Sûk-ı sultânî’de vâki‘ Sevdim Bey binâ eylediği mescid-i şerîfi vakfının evlâdiyet ve meşrûtiyet üzere bâ-berât-ı âlîşân tevliyetine yevmî bir buçuk akçe vazîfe ile bi’l-iştirâk mutasarrıfları sahib-i arzuhâl es-Seyyid el-Hâc Mehmed b. İbrahim ve diğer Seyyid Mehmed b. İbrahim nâm kimesneler vakf-ı mezbûrun gallesinden senevî dört yüz guruş evlâd-ı vâkıfın zükûruna tevzî‘ ve taksîm olunagelip bâkīsini mescid-i mezbûrun ta‘mîr ve termîmine sarf ve ehl-i mürtezikanın vazîfelerini edâ etmek üzere verilegeldiği ve tekāyüd-i kadîmi dahi mahâllinde bi’d-defa‘ât ihbâr olunduğundan bahisle galle-i mezbûrun bâkiye[sine] müdâhale îcâb etmez iken evlâd-ı vâkıfdan Avarlı? Ali ve tüccâr Abdurrahman ve tüccâr Ebûbekir ve Şeyh Abdullah nâm kimesneler amel-i kadîm ve mugāyir-i berat-ı âlîşân müdâhale ve nizâ‘dan hâlî olmadıklarından merkūmûnun galle-i mezkûrenin dört yüz guruşdan mâ‘adâya dahl ü ta‘arruzlarını men‘ [u] def‘ için dört yüzden mâ‘adâ bir kıt‘a emr-i âlî ısdârı istid‘âsında oldukları mefâd-ı arzuhâlden nümâyân olmağla fi’l-hakīka tevliyet-i mezkûre vazîfe-i mersûmesiyle merkūmân es-Seyyid el-Hâc Mehmed ve diğer el-Hâc Mehmed’in üzerlerinde olduğu derkenârdan müstebân ve vakf-ı mezkûrun vakfiyesi olmayıp meşrûtu nâ-ma‘lûm olmağla merkūmânın istid‘â eyledikleri emr-i âlî vakf-ı mezkûra bir vechile enfa‘ olmağın bu sûretde vakf-ı mezbûrun gallâtından senevî dört yüz guruşunun ber-mûceb-i amel-i kadîm evlâd-ı zükûruna tevzî‘ ve taksîm, bâkīsini mescid-i şerîfin ta‘mîrine sarf ve ehl-i mürtezikanın vazîfelerini min-gayri leccin edâ ederek ve her sene vakf-ı mezkûrun muhâsebesi mahâllinde ber-nehc-i şer‘î rü’yet olunup ba‘de ihrâci’l-mesârif bâkī fazla kalan gallesini mütevellî-i merkūmân ma‘rifeti ve ma‘rifet-i şer‘le istirbâh birle mescid-i mezkûrun iktizâ eden ta‘mîr ve termîmine sarf olunmak şartıyla sâlifü’z-zikr dört yüz guruşdan galle-i vakfa müdâhale olunmamak bâbında mütevelliyân-ı merkūmân es-Seyyid el-Hâc Mehmed ve diğer es-Seyyid Mehmed nâm müşterekleri yedine bir kıt‘a emr-i celîlü’ş-şân i‘tâsı emr-i savâb idiği huzûr.