|
Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 125 Hüküm no: 112 Orijinal metin no: [23a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Akşemseddin Vakfı mütevelliliği hissesinin Veli b. Ebûbekir’den alınarak evlad-ı vakıfdan Ahmed b. Ömer’e verilmesi
Sâdır olan fermân-ı âlîlerine imtisâlen işbu arz [ve] derkenâra nazar olundukda Anadolu’da Tahte’t-tarîk-i Göynük ve Niksar kazâlarında vâki‘ merhûm Akşemseddin Vakfı’ndan olmak üzere bâ-berât-ı âlîşân yevmî iki buçuk akçe vazîfe ile nısf hisseli tevliyet eslah ve ekber ve erşed evlâd-ı vâkıfdan Ömer b. Osman bâ-berât-ı âlî mutasarrıf iken fevt oldukda mahlûlünden sulbî oğlu ekber, eslah ve erşedden Ahmed b. Ömer’e şart-ı vâkıf üzere tevcîh olunmak îcâb eder iken ecânibden Veli b. Ebûbekir evlâd-ı vâkıfdan ve ekber, eslah, erşedden deyü unvân-ı gayr-ı vâki‘ ile bir takrîb üzerine nısf hisse tevliyet-i mezkûru tevcîh ettirmiş idiği bu def‘a huzûr-ı şer‘-i şerîfde terâfu‘ olunduklarında merkūm Veli b. Ebûbekir’in hilâf-ı vâki‘ ve mugāyir-i şart-ı vâkıf üzere tevcîh ettirdiği inde’ş-şer‘ nümâyân olmağla merkūm Veli’nin ref‘inden ve babası müteveffâ-yı merkūmun mahlûlünden ekber ve eslah ve erşed evlâd-ı vâkıfdan merkūm Ahmed b. Ömer’e nısf hisse-i tevliyet mezkûra tevcîh olunmasını kazâ-i mezbûr nâibi Mehmed Emin Efendi’nin bundan [akdem] sâdır olan fermân-ı âlîlerine cevâb olarak vürûd eden mühr-i mutâbık arz-ı mezkûr meâlinden müstebân olmak fi’l-hakīka nısf hisse-i tevliyet-i mezkûr müteveffâ-yı merkūm Ömer b. Osman’ın mahlûlünden Veli b. Ebûbekir’e tevcîh olunup üzerinde olduğu derkenârdan müstebân ve merkūm Ahmed müteveffâ-yı merkūmun sulbî oğlu olup ekber ve eslah ve erşed evlâd-ı vâkıfdan olup tasarruf kendüye münhasır idiği kazâ-i mezbûr ahâlîsinden Der-aliyye’de müsâfir sâkinler Ahmed b. Mehmed ve İbrahim b. Osman nâm kimesneler dahi haber vermeleriyle nısf hisse-i tevliyet-i mezkûr merkūm Veli b. Ebûbekir ref‘inden peder mahlûlünden şart-ı vâkıf üzere merkūm Ahmed b. Ömer’e tevcîh ve yedine berat-ı şerîf-i âlîşân sadaka ve ihsân buyurulmak iktizâ eylediği huzûr-ı âlîlerine i‘lâm olundu.
Fî 25 C sene [12]49
|