Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 320 Hüküm no: 470 Orijinal metin no: [62b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muytab İbrahim Edhem Ağa’nın babasının nafakası ile techiz ve tekfin masraflarından dolayı kardeşi Şeyh Mustafa Efendi’ye açtığı davayı ispat edemediği 260 guruş bilâ-beyyine mu‘ârazadan men‘ Ma‘rûz Muytab esnâfından İbrahim Edhem Ağa b. Mehmed nâm kimesne İstanbul Bâb Mahkemesi’nde meclis-i şer‘-i münîrde li-ebeveyn er karındaşı eş-Şeyh el-Hâc Mustafa Efendi muvâcehesinde pederimiz olup bundan akdem fevt olan Mehmed nâm kimesne <> hâl-i hayatında mu‘dim ü mu‘sir ve kâr ü kisbe kudreti olmadığından pederimiz merkūmun nafakasi’çün bin iki yüz kırk beş senesi Muharremi’l-harâmının dokuzuncu günü mahkeme-i mezbûrede huzûr-ı hâkimü’ş-şer‘de bâ-hüccet üzerlerimize bi’t-terâzî beher şehr onar guruşdan ikimize cem‘an yirmi guruş farz ve takdîr olundukdan sonra bin iki yüz kırk yedi senesi hilâlinde pederimiz merkūm Mehmed fevt olmağla nafaka-i mukarrere-i mefrûza-i müstedânesinden târîh-i hüccet-i mezkûreden pederimiz merkūmun hîn-i vefâtına değin yirmi dört ayda ben karındaşım mezbûrun bi-şartı’r-rücû‘ emriyle pederimiz mezbûra hayatında mâlımdan beher şehr onar guruşdan medfû‘um olan iki yüz kırk guruş ve pederimiz merkūmun hîn-i fevtinde yine mezbûrun emir ve tevkîliyle techîz ü tekfîn ve levâzım-ı defni’çün mâlımdan harc ü sarf eylediğim yüz kırk guruşdan karındaşım merkūmun hissesine isâbet eden yetmiş guruş ki min-haysü’l-mecmû‘ bi’l-mürâca‘a hakkım olan üç yüz on guruşdan otuz guruşunu istîfâ etmemle bâkīsi olan iki yüz seksen guruşu karındaşım mezbûr es-Seyyid el-Hâc Mustafa Efendi’den bi’l-mürâca‘a taleb ederim deyü ba‘de’d-da‘vâ ve’l-inkâr müdde‘î-i merkūm ber-vech-i muharrer müdde‘âsına ikāmet-i beyyine edemeyip bi’t-taleb merkūm eş-Şeyh el-Hâc Mustafa Efendi bi’l-muvâcehe ber-nehc-i şer‘î tahlîf olunmağın mûcebince müdde‘î-i mezbûr İbrahim Edhem Ağa da‘vâ-yı mezkûresiyle karındaşı merkūm eş-Şeyh el-Hâc Mustafa Efendi’ye bilâ-beyyine mu‘ârazadan men‘ olunduğu mübâşirleri Bâb-ı Seraskerî kavaslarından Kasımpaşalı Salih Kavas kulları yediyle huzûr-ı [âlîlerine i‘lâm olundu] Fî 25 Muharrem sene 1256