Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 322 Hüküm no: 473 Orijinal metin no: [63a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafız Hasan’ın firar eden ortağı Mehmed’in bulunması veya aldığı eşya ve paraların ödenmesi talebiyle Mehmed’in kefili Selim Ağa’ya açtığı davanın reddedildiği Nefsine kefîl olmuşdur deyü da‘vâ men‘ Ma‘rûz Asâkir-i Mansûre mülâzımlarından Hafız Hasan b. Ahmed nâm kimesne İstanbul Bâb Mahkemesi’nde meclis-i şer‘de Trablus? vekîli el-Hâc Selim Ağa b. Ahmed nâm kimesne muvâcehesinde ben işbu târîh-i i‘lâmdan iki buçuk sene mukaddem Mekteb-i Harbiye’de olduğum esnâda şerîkim olup gāib ani’l-beled Mehmed nâm kimesne dolabımın kuflünü bir takrîb feth ü küşâd ve derûnunda mevcûd mâlım olan mecmû‘u bin yüz elli guruş kıymetli bir hilâlî koyun sâ‘atimi ve etrâfı üzengili bir yâkut yüzük ve bir kehribâ çubuk takımı ve bir mikdâr sîm zincir ile üç yüz kırk guruş nakdimi fuzûlî ve bi-gayri hakkın hufyeten ahz ve diyâr-ı âhara firâr ve gaybûbet ve ne mahâlde olduğu ma‘lûm olmayıp ancak merkūm el-Hâc Selim Ağa gāib-i merkūm Mehmed diyâr-ı âhara firâr ve gaybûbet etmeksizin nefsine kefîl olmağla merkūm el-Hâc Selim Ağa’ya suâl olunup gāib-i mezbûru bulup bana teslîme yâhûd zikrleri mürûr eden emvâlim ile nakd-i mezkûru bana tazmîne merkūm el-Hâc Selim Ağa’ya tenbîh olunmak murâdımdır deyü takrîr-i meşrûhu üzere tasaddî eylediği da‘vâsı meşrû‘a ve iltifâta şâyân olmadığı müdde‘î-i merkūm Hafız Hasan’a ba‘de’t-tefhîm da‘vâ-yı mezkûreleriyle merkūm el-Hâc Selim Ağa’ya bî-vech-i şer‘î mu‘ârazadan men‘ olunduğu mübâşirleri Bâb-ı Seraskerî kavaslarından Hasan Kavas kulları yediyle huzûr-ı [âlîlerine i‘lâm olundu] Fî 8 S sene [12]56