Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 323 Hüküm no: 474 Orijinal metin no: [63a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü İsak’ın Osman Ağa’ya olan borcunu ödemesi 1400 guruş hüküm Ma‘rûz Osman Ağa b. Abdullah nâm kimesne İstanbul Bâb Mahkemesi’nde meclis-i şer‘-i münîrde Tütüncü İsak v. Menahim nâm Yahûdi muvâcehesinde mersûm İsak Yahûdi zimmetinde bundan akdem mâlımdan ve yedimden iştirâ ve kabz eylediği duhân semeninden ba‘de külli’l-hesâb gayr-ı ez-teslîmât sahhu’l-bâkī bin dört yüz guruş alacak hakkım olmağla meblağ-ı bâkī-i mezkûr[u] mersûm İsak Yahûdiden hâlâ taleb ederim deyü da‘vâ ettikde ol dahi cevâbında ber-vech-i muharrer ikrâr lâkin ben deynim olan meblağ-ı bâkī-i mezkûrun iki yüz guruşunu târîh-i i‘lâmdan bir ay mukaddem İstanbul’da Balatkapısı dâhilinde vâki‘ berber dükkânında müdde‘î-i merkūma edâ ve teslîm <> etmemle ol vechile zimmetimde bin iki yüz guruş deynim bâkī kalmışdır deyü müdde‘î-i merkūmun inkârına mukārin eylediği def‘ine ikāmet-i beyyine edemeyip tahlîfe dahi tâlib olmamağın mûcebince dâfi‘-i mersûm def‘-i mezkûruyla merkūm Osman Ağa’ya bilâ-beyyine mu‘ârazadan ba‘de’l-men‘ mersûm İsak Yahûdiden sâlifü’l-beyân ikrârıyla lâzım gelen meblağ-ı mezkûr bin dört yüz guruşun müdde‘î-i merkūm Osman Ağa’ya edâsıyla mersûm İsak Yahûdi ilzâm olunduğu mübâşirleri Bâb-ı Seraskerî kavaslarından İbrahim Kavas kulları yediyle huzûr-ı [âlîlerine i‘lâm olundu] Fî 11 S sene 1256