Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 327 Hüküm no: 481 Orijinal metin no: [64b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Setrak v. Karabet’in vefat eden babasının alacağından hissesinin verilmesi talebiyle Artin ve Mıgırdıç’a açtığı davada sulh olduğu 100 guruşa sulh [Ma‘rûz] Bundan akdem hâlik olan Karabet v. Kifork v. Atam nâm zimmînin verâseti zevce-i metrûkesi Horosima bt. Kirhor nâm Nasrâniye ile sulbî kebîr oğulları Setrak ve Rapail zimmîlere münhasıra olduğu lede’ş-şer‘i’l-enver zâhir ve mütehakkık oldukdan sonra verese-i mersûmûndan arzuhâl eden mersûm Setrak zimmî İstanbul Bâb Mahkemesi’nde meclis-i şer‘-i şerîf-i hatîrde derûn-ı arzuhâlde isimleri mastûr Artin v. Ohannes ve Mıgırdıç v. Ohannes nâm zimmîler muvâcehelerinde mûrisimiz babam hâlik-i mersûmun mersûmân Artin ve Mıgırdıç zimmîler zimmetlerinde nühâs semeninden bin iki yüz guruş alacak hakkı olup meblağ-ı mezkûru babam mersûm Karabet zimmî mesfûrândan kable’l-ahz ve’l-istîfâ hâlik ve meblağ-ı mezkûr bize mevrûs olmağla meblağ-ı mezkûrdan hisse-i irsiyeme isâbet eden beş yüz yirmi beş guruşu zimmiyân-ı mersûmândan bi’l-verâse taleb ederim deyü tasaddî eylediğim da‘vâmdan bâ-tavassut-ı muslihîn zimmiyân-ı mersûmân ile kat‘an li’n-nizâ‘ yüz guruş üzerine bi’l-verâse ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra müte‘allika da‘vâmdan tarafeynden her birimiz âharın zimmetini bi’l-asâle ve bi’l-verâse kabûlü hâvî ibrâ ve iskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr yüz guruşun müdde‘î-i mersûm Setrak zimmîye bi’t-taleb edâsıyla mersûmân Artin ve Mıgırdıç zimmîler ilzâm olunduğu huzûr-ı [âlîlerine i‘lâm olundu] Fî 10 S sene [12]56