Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 327 Hüküm no: 482 Orijinal metin no: [64b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mardiros’un masa bedelinden Mikail’e olan borcunu ödemesi 228 guruş ilzâm Ma‘rûz Mikail v. Minas nâm zimmî İstanbul Bâb Mahkemesi’nde meclis-i şer‘-i hatîrde Mardiros v. Serkiz nâm zimmî muvâcehesinde mersûm Mardiros zimmî zimmetinde bundan akdem mâlımdan ve yedimden iştirâ ve kabz eylediği ma‘lûmü’z-zirâ‘ masa semeninden iki yüz yirmi sekiz guruş alacak hakkım olmağla meblağ-ı mezkûru mersûm Mardiros zimmîden hâlâ taleb ederim deyü da‘vâ ettikde ol dahi cevâbında ber-vech-i muharrer ikrâr lâkin deynim olan meblağ-ı mezkûr 228 guruşu mersûm Mikail zimmînin emriyle şerîkim gāib ani’l-meclis İstefan zimmîye edâ ve teslîm etmişidim deyü inkâra mukārin eylediği def‘ine ikāmet-i beyyine edemeyip bi’t-taleb mersûm Mikail zimmîye bi’l-muvâcehe vech-i şer‘î üzere yemîn verilmeğin mûcebince dâfi‘-i mersûm def‘-i mezkûruyla mersûm Mikail zimmîye bilâ-beyyine mu‘ârazadan ba‘de’l-men‘ mersûm Mardiros zimmînin sâlifü’l-beyân ikrârıyla lâzım gelen meblağ-ı mezkûr iki yüz yirmi sekiz guruşu müdde‘î-i mersûm Mikail zimmîye edâya mersûm Mardiros zimmîye tenbîh olunduğu mübâşirleri Bâb-ı Seraskerî kavaslarından Kasımpaşalı Mehmed Kavas kulları yediyle huzûr-ı [âlîlerine i‘lâm olundu] Fî 11 S sene [12]56